Khuslai ki paidbah ka thain Byrnihat ba duna tyndong lyer, kyntu ia ka sorkar ban pynbiang

Ka jingkyrduh tyndong lyer (LPG) ka la sdang ban paw pyrthei ha Ri Bhoi District kaba la pynkhuslai ia ki paidbah jong bun tylli ki Shnong kiba ju shaniah ban shet jingshet da ki tyndong lyer, kane ka jingduna tyndong lyer ka paw na kawei ka Gas Agency kaba la tip kum ka Wankhar Gas Agency kaba don ha Byrnihat.

Kane ka Wankhar Gas Agency kaba pyniaid da u Bah P.M Wankhar bad ka Kong S. Marbaniang ka dei ka agency kaba pynbiang tyndong lyer ia ki Shnong naduh Umling terter shaduh Umsen hynrei mynta namar ka jingduna ka jingshalan tyndong lyer ka la buh jingeh ymtang ia ka Agency hynrei wat ia ki paidbah.

Ka Kong S. Marbaniang ka la iathuh, ba baroh shikatta kum ka agency ka la iai shakri ia u paidbah ban pynbiang tyndong lyer khlem kano kano ka jingeh, hynrei mynta la katto katne por kum agency ka la mad jingeh namar bym poi ka jingshalan tyndong lyer kaba la buh jingeh ruh ia ki paidbah kiba ap tmang ban ioh ia ki tyndong lyer.

Ka la iathuh ruh, ba namar ka jingduna tyndong lyer bun ki paidbah ki la thnum bad iai phone ia ki trai ban pynbiang gas bad don ki riew paidbah kiba leit mih sha ophis jong ki ha Byrnihat bad hylla ia ki namar bym ioh tyndong lyer haduh ba ka la pynsngewsih ia ki kum ki nongpyniaid ia ka agency namar la palat 20 snem kam shem la don kano kano ka jingthut ha ka jingshalan.

Kum ki nongpyniaid gas Agency, ka Kong Marbaniang ka la kyrpad ia ki bor jong ka Sorkar Jylla ban shimkhia noh mardor ban pynbiang ia ka jingshalan tyndong lyer khnang ba ki paidbah hi kin nym mad jingeh na ka jingbym ioh tyndong lyer, kumjuh ka la kyrpad ia ki paidbah ba kim dei ban sngewthuh bakla halor ka jingduna gas hynrei ban iaishah shipor da kaba pynkynmaw ruh ba ki paidbah ki dei ban book lypa haba ki donkam gas namar mynta la kyntiew ia ki sngi ban booking na ka 20 sngi sha ka 45 sngi.

Lah ban kdew ba ka jingeh halor ka jingsdang duna tyndong lyer, ka la pynsyrtok ruh wat ia kito ki riew paidbah kiba pyniaid ia ki dukan bam lane restaurant ha kiba bun ki thain ka district namar ka jingbym ioh biang por ia ki tyndong lyer domestic.