Ai burom ka Priya Ghosh ia ki nonghikai bad kiba iing ba wan nyngkong ha ka Commerce

Ka samla Priya Ghosh jong ka St Edmund Higher Secondary School kaba wan nyngkong ha ka eksamin HSSLC Commerce ka la ong, ba ka jingjop jong ka kam dei eh tang ha ki Marks ba ka ioh.

Ka Priya Ghosh ka la ioh 458 Marks ka la ong, ba ka Resol ka pynpaw ïa ka jingkyrshan na kiba haïing hasem bad ki nonghikai ba la pynwan dur ïa ka jinglong bad ia ka akor ka burom.

“Nga la ioh ia bat ia ka kyrdan nyngkong ha ka eksamin HSSLC. Nga tharai ba ka jingtrei shitom jong nga ka la sei soh” la ong Priya.

Ka Priya ka la ai burom ia ka iing ka sem khamtam ia u hynmen u Suman Das uba pynkhreh kot naduh ka klas IV.

“Ki nonghikai jong nga, ki kmie ki kpa jong nga, u hynmen jong nga, baroh ki la trei shitom bad ki la don ka bynta kaba khraw ban ym tang ban pynwan ïa ka jingpule jong nga hynrei ki la pynrung ha nga ïa ki jinglong babha, ka akor kaba nga pyrkhat ba ngan iai bteng ban bat nangne shakhmat ha ka jingim jong” ka la ong.

“Ka Class Teacher jong nga ka ju pynshlur ia nga haba nga shem ki jingeh, ka la pynshlur bad ka la ong ia nga ba ngam dei ban kynran dien” la ong ka Priya.

Ka la batai ba u Nonghikai Felix u long kum “kum u kpa” uba la iarap bad pynshlur ia nga naduh ka sngi kaba nyngkong ba nga wan pule ha St Edmund’s.”

Ka Priya ka la kdew ba ka klas XI kum ka jingsdang haba iadei bad ka eksamin klas XII. “Ka nongrim ba nga ioh naduh klas XI ka don ka bynta kaba kongsan ha ka jingjop bad nga la long kaba ïaineh ban trei shitom naduh ka klas XI. Ki nonghikai jong nga ki la ïohi ïa ka jinglah ha nga, ki ju pynshlur ïa nga. Ki dei ki mawsiang bad ki nongkyrshan jong nga,” ka la ong.

“Baroh ki nonghikai ha skul kim shym la pynlong ia nga tang ka khynnah skul kaba bha, hynrei ki la pynlong ia nga ka briew uba bha.”

Haba kylli, ka samla Priya kala ong “To bud ia kaei kaba phi sngewtynnad, ieid ia kaei kaba phi leh bad ai ia kaba bha tam jong phi katba phi lah ban leh. Bad ym tang ba phin long kiba bha ha ka kam jong phi, to long kiba bha kum ki briew bad iarap ia kiwei ban sngewthuh kata ruh ka pynlong ia phi uwei na ki nongjop”.

Ka samla Priya kala pynpaw ba ka kwah ban leh Research ha ka Finance hynrei ka sngewtynnad ruh ban phaikhmat shaka Public Service.

Haba iadei bad ki jingpyndonkam ia ki rynsan Social Media, ka samla Priya ka pynpaw ba donkam ban bate iaka por haba pyndonkam iaki.

“Nga tharai ba ka social media ka la ïarap bha ïa nga. Ki samla pule kim dei ban pynleit jingmut tang haki kot skul, ka social media ka la don ka bynta kaba khraw ha ka jingtip kyllum jong nga. Ka shong ha ka rukom ba phi pyndonkam ïa ka social media” ka la ong.

Watla katta ruh haka por eksamin, ka samla Priya kala kyntait ban pyndonkam iaki, “Ha ki ar bnai ba nga la pynkhreh ia ka eksamin, ngam shym la pyndonkam ia kino kino ki social media, nga hap ban pynleit jingmut beit tang haka jingpule” ka la ong.

“Ka jingpule ka long kaba kongsan hynrei ha kajuh ka por kumno phin sngewtynnad ia ka jingim jong phi, ka long kaba kongsan shibun. Namar nga pyrkhat ba ka jingpule jong nga ka la pynlong ia nga ban ioh kheit ia u soh ka jingjop, nga kwah ban ong ia kiwei pat ki samla pule, sngewbha ia ka jingpule bad ha kajuh ka por sngewbha ia ka jingim jong phi ruh”, la ong ka Priya.