Tuid ki riewngeit da ki hajar sha ka jingiaseng General Assembly PCIKa PCI ka nang pyndep ki kam ba ki nongsengki ieh shadien: Rev LS Nongphlang

Da ki hajar ngut ki paid riewngeit na kylleng ki jaka ka jylla bad nabar ka jylla Meghalaya, ki la ia tuid sha ka jingiaseng Biennial Session kaba Sawphew Hynriew bad ka jingrakhe dap 100 snem jong ka General Assembly Presbyterian Chuch of India (PCI) kaba long hynne ka sngi ha madan JN Complex Polo.
Ia kane ka jingiaseng la pdiang da ka Balang Presbyterian Phudmuri kaba hap ha ka KJP Syndo Sepngi, kaba sdang naduh ka miet jong ka 28 tarik Iaiong bad la pynkut noh hynne ka sngi u Blei ha madan Polo.
U Moderator ka General Assembly PCI ha kane ka sngi ula pdiang sngewbha ia baroh ki para riewngeit na ki 4 tylli ki Synod ka jylla bad na kiwei ki jylla kynthup ruh ia u Myntri Rangbah ka jylla u Conrad K. Sangma lem ki kynhun Myntri sorkar, ki MLA bad ki MDC.
Ka phang pdeng ha kane ka jingiaseng ka long ‘To long ka Burom ia u Blei ha la rta (To God be the Glory Forever).
Ha kane ka sngi la ioh ia ka jingrwai Choir na ki Balang bapher bapher jong ka Synod bad la sam ia ka ktien u Blei na u Rev LS Nongphlang uba dei u Pastor Rangbah ka Balang Ri Bhoi Presbyterian Synod uba dei ruh u Secretary Rangbah barim jong ka General Assembly PCI.
U Pastor Nongphlang ula ong ba ka PCI ka la paw pyrthei ha ka ia ka por kaba biang kata ha u sem 1926 bad ki pdiang ba ki sngi Jubili ki long ki sngi kiba kmen bad kiba pynkyndeh ia ka Balang bad ki dkhot jong ka.
Ha kane ka sngi u Pastor Nongphlang ula sam ia ka khubor halor “Ka Ding kan iai meh halor kata ka duwan bad ban ym pynlip satia ia ka”.
U la kyntu ia baroh ki riewngeit ba kin pynkhlain ia ka bor jingduwai, ban niew ia ki jingkyrkhu kiba ki la ioh pdiang bad ban niew ruh ka jingshitom kaba ki la shah na bynta ka Gospel bad ba kin iai pynrhem ia ka ding wat ha ka miet kaba dum tam bad kan iai meh ha ka jingim haduh ka jingwan pat jong u Trai bad ki phliah ding kiba kynja mynsiem kin iai rhem ha ki dohnud bad ki rympei iing.
“Lada duh noh ia ka jingrhem kaba kynja mynsiem, ka jingai nguh jong ngi ruh kan kylla khriat noh,” ong u Pastor Nongphlang.
U la ong ba wat la ka PCI ka dei ka kynhun kaba rit, hynrei dei ban kynmaw ba kaba hyndiat ka long kaba bun lada don u Blei.
Ka histori jong ka PCI kan sdang thymmai sa shisien ha kane ka sngi bad la pynpaw ka jingsngewkmen ba la nang pyndep ia ki kam kiba ki nongseng ki la ieh shadien jong ki.