Ka Khanasamari da ki bor ‘DIGITAL’ ban pynkup bor ia ki nongshong shnong

Ka jingai jingkhein na bynta ka khanasamari ne census 2027, ka la sdang ha kylleng ka jylla naduh ka 1 tarik u Jymmang 2026, kaba long u mawmer ba kongsan ha ka khanasamari banyngkong ka ri India kaba pyndonkam da ka lad digital. Ia kane la pynbna da ka Press Information Bureau (PIB), Shillong ha ka jingialang bad nongthohkot khubor ryngkat ka jingiatreilang bad ka Directorate Census Operations, Meghalaya mynta ka sngi ha Shillong Press Club.

Haba kren sha ki Nongthoh Khubor u Director ka tnad Census Operations Meghalaya ka sorkar India u Biswajit Pegu ula ong, ka Khana Samari 2027 ka long kaba kongsan naduh ba ïoh ïa ka jinglaitluid. U la ban jur ha ka sien nyngkong ïa ka kam ba ia dei bad ka khanasamari baroh kawei ban lum jingkhein ia ki briew bad bishar bniah ïa ki jingtip yn pynlong da ki kor ki bor digital da kaba pyndonkam ïa ki mobile application bad ka rynsan Census Management and Monitoring System (CMMS).

U Pegu ula pyntip ki nongshong shnong kin don ka lad ban ai jingkheiñ hi da lade lyngba ka rynsan online naduh ka 1 tarik u Jymmang haduh ka 15 tarik u Jymmang 2026. Kane ka ai lad ïa ki briew ban pynbiang ki jingtip ba bniah shaphang ka longing bad hadien yn pynshisha da ki nongshim jingkhein ha ka por ba ki leit rung man ki tyngkong ki ïing. U la ban jur ba kane ka sienjam kan iarap ban ioh jingtip ba thikna ia ki paidbah halor ka khanasamari.

Ia ka khanasamari 2027 yn pynlong ha ki ar bynta. Ka bynta I kynthup ia ka jingai jingtip da lade bad ka House Listing Operations (HLO). Hadien ka samoi ai jingtip dalade yn pynlong ia ka HLO naduh ka 16 tarik u Jymmang haduh ka 14 tarik u Jylliew 2026, ha kaba ki nongshim jingtip kin lum ia ki jingtip shaphang ki jinglong jingman ki longiing, ki jingdon jingem, bad ki jingdonkam ba la buh ryntih kynthup ia 33 tylli ki jingkylli. Ka bynta ba II, ka jingkhein ia ki nongshong shnong kan long ha u bnai Rymphang 2027 bad ka tarik ba la buh ha ka 1 tarik u Lber, 2027.

Haalor kane ka ain u Pegu ula ong, ia ka khanasamari la pynlong hapoh ki kyndon ka Census Act 1948 bad Census Rules, 1990. Ula bynrap ka jingpynkylla digital kan pynthikna ban ioh jingkhein ba biang lyngba ki jingkylli ba la buh lypa ha ki mobile application bad ka jingpyntreikam kham kloi ba plie lad ban ioh ki jingtip ha ka por ba biang.

U la bynrap ia ka jinglum jingtip yn pynlong lyngba ki mobile apps ba kyrpang ba la pyndonkam da ki nonglum jingtip bad ki nongpeit ha ki smartphone. Ka rynsan CMMS kan pyniaid ia baroh kynthup ia ka jingai jinghikai, ka jingpeit bniah bad ka jingthaw ia ki House Listing Block ba la don ka geo-code lyngba ka HLB Creator (HLBC). Ia ki jingtip ba la ai hi yn pynshisha ha ka por ba leit sha ki iing shwa ban ai ti jingkhein khatduh.

U Pegu ula pynthikna ba la pyntreikam ïa ki lad jingïada kiba khlaiñ ban pynneh ïa ka jingiada ia ki jingtip bad yn ym pynpaw ia ki jingtip ki briew bad ki longiing bad yn pyllait tang ia ki jingtip ba lalum lang ha ki kyrdan pyniaidkam bapher bapher na bynta ban thaw ia ki polisi bad ka jingpynkhreh na bynta ka roi ka par. Ia ki number mobile ba lalum yn pyndonkam na bynta ban pynshisha.

U la pyntip shuh shuh ba kumba 9,000 ngut ki nonglum jingtip bad ki nongpeit yn buh ha kylleng ka jylla ryngkat bad ka rukom peit bniah ban pynthikna ia ki jingtip. Ka Khanasamari kan kynthup ia baroh ki longiing katba ki katto katne ki thup kum ki bar jylla bad ki nongtrei sorkar na kiwei ki ri yn nym kynthup ha ka HLO.

Katba u Subhasish Chatterjee, Joint Director, Tnad Census Operations, Meghalaya ula ong ba la plie paidbah ïa ka national toll-free helpline -1855- ha kylleng ka ri India kum ka jingpynkhreh ïa ka Khanasamari 2027. U la pyntip ba la thaw ïa ka helpline ban ïarap ïa ki nongshong shnong halor ki jingkylli ba ïadei bad ka khanasamari kynthup ki kam shaphang ki ïing bad ka jingkheiñ ïa ki nongshong shnong. Kane kan kan iarap ban weng ia ki jingeh bad ban pynthikna ba ki briew kin ioh ia ki jingtip ha ka por kaba biang.

Ia ki pud jong ka kam synshar jong ka Meghalaya la khang noh naduh ka 31 tarik u Nohprah 2025, na ka bynta ka KhanaSamari. Ia kane ka kan yn pynlong hapoh ka jingpeit jong ki Deputy Commissioner kum ki Principal Census Officer, la kyrshan da ki Charge Officer, ki Supervisor bad ki Enumerator.

Ki heh sorkar lyngba ki lad pathai khubor ki la kyntu ia ki paidbah ban iashim bynta shitrhem ha ka rukom ai jingtip da lade ban iatreilang ban ioh ki jingtip ba thikna na bynta ka roi ka par kynthup ia baroh bad ka jingsynshar ka pynshongnongrim ha ki sakhi ha ka jylla bad kumjuh ka long kongsan ban pynsngewthuh paidbah. Ki nongthoh khubor ki don ka bynta ba kongsan ban pynsaphriang ïa ki jingtip ban lait na ki jingsngewthuh bakla bad ban iarap ïa ki nongshong shnong ban ïashim bynta da ka jingshaniah ha ka Khanasamari 2027.

Kiwei pat ki ophisar ba donlang ha jingialang ki kynthup ia u Subhasish Chatterjee, Joint Director, u B. Basumatary, Deputy Director; Bah Aibor Sanglyne, Deputy Director na ka Tnad Census Operations. Ia ka jingialang bad ki lad pathai khubor la pyniaid da u Assistant Director ka PIB Shillong u Gopajit Das.