Hiar jurip u Bah Prestone iaka jaka ban shna PS bad TIC ha jingkieng Umshyrpi

U Symbud Myntri Rangbah ka Jylla u Bah Prestone Tynsong ha ka Sngi Thohdieng ula leit jurip ia ka jaka hajan jingkieng Umshyrpi ha kaba la ithuh ia ka jaka na ka bynta ban tei ia ka Police Station bad Fire Station, ka Tourist Information Centre bad ka ophis bad ia ka Community Hall  ka Synjuk ki Rangbah Shnong Upper Shillong. Ha kane ka jingleit jurip u Symbud Myntri Rangbah ka Jylla la ia donlang ki heh pulit ka jylla ki heh ophisar sorkar, ki nongialam ka Synjuk ki Rangbah Shnong ka Upper Shillong bad kiwei.

U Bah Prestone ula ong, ba ka jingjurip kadei ban khmih ia ki jaka bad ban shim ia ka rai ban tei ia ki jingtei kiba kongsan ha kane ka thaiñ bad ka sorkar ka don ia ka jingthmu ban tei ia ka Police Station bad ka Fire Station ba pura ha ka jaka kaba don marjan bad ka Jingkieng Umshyrpi kaba long ka jaka kaba biang bha. U Bah Prestone ula ong, ba ki la peit ruh ia ka jaka na ka bynta ban buh ia ka Tourist Information Centre ban ai jingshakri ia ki nongwan jngohkai bad ruh ban tei ia ka ophis treikam bad ka Community Hall jong ka Synjuk ki Rangbah Shnong Upper Shillong khamtam haba man la ka por ka Synjuk ki Rangbah Shnong kala wan kyrpad na ka sorkar ban ai jaka kumba 2000-3000 square feet na ka bynta ban shna ia ka Office bad ia ka Community Hall.

U Bah Prestone ula ong, ruh ba yn sa lum ia ka jingialang ba ki tnad sorkar khnang ba kin shim ia ki sienjam ban ioh ban pyniaid shakhmat ia ki kam ki jam.