Iakynduh u Lat ia ki khynnah pule riewlum ba ioh baibam pass matrik

U Lat ka Jylla u CH Vijayashankar hynne ka sngi, ula lum ia ka jingialang ha Lok Bhavan bad iakren markhmat bad ki khynnah pule kiba la ioh ia ka jingmyntoi na ka Post-Matric Scholarship (ST) bad ula kular ruh ia ki ba yn shimkhia ia ka jingeh kaba ki mad bad ki bor kiba dei khmih.Kane ka jingiakynduh u Lat ia ki khynnah pule, kadei shi bynta jong ka “Birsa Lives in New Bharat” ia kaba la pynlong ha ka ri baroh kawei ia ka jingrakhe ia ka Janjatiya Garima Utsav naduh ka 10 tarik u Jymmang haduh ka 9 tarik u Jylliew 2026 bad ha kane ka jingialang la iadonlang u Additional Chief Secretary jong u Lat ka Jylla u HC Chaudhary, u Commissioner and Secretary ka tnad pule puthi u Bah Ryntihlang Rapthap bad ki ophisar na ka tnad pule puthi.

Ha ka jingiakren kaba markhmat bad u Lat ka jylla, ki khynnah pule na ki district ki bapher kila pynpaw ba ka scholarship kala iarap ha kaban pynlut pynsep ha ka pule puthi khamtam ha kaban siew ia ka bai khreh kot, eksamin, jingsah Hostel, ban thied ia ki kot ki sla bad kiwei kiwei ki jingdonkam bad kane ka scheme kala pynduna ia ka jingeh jong ka iing ka sem ha ka pisa pilain bad kala plie lad ia ki ba kin bteng ia ka jingpule ka jongki. Ki khynnah pule kila pynpaw ia ki jingeh kaba ki mad kaba kynthup ia ka jingpynshisha lyngba u Aadhaar, ka jingslem ha kaban pynshisha ia ki kot ki sla, ki jingeh kaba ki mad haba ki leh ia ka online portal, jingslem ha kaban ioh ia ka scholarship bad jingduna palat ha kaban ai iaki jingpynsngewthuh ia ka rukom aplai na ka bynta ki khynnah pule kiba na ki jaka nongkyndong.

U Lat ka Jylla ula pynthikna ia ki khynnah pule ba kane ka jingai jingtip kaba kordor ka jongki kadei kaba yn sa pyntip sha ki bor kiba dei khmih ba kin leh ia kaba donkam bad ula banjur ia ka jingdonkam ban pynkhlain ia ki jingai jingpynsngewthuh, ban pynsuk ia ka rukom aplai, ban kyntiew ia ki lad ban ai jingkyrshan bad pynthikna ban pynbeit mardor ia kitei ki jingeh khnang ba yn ym don kino kino ruh ki khynnah pule riewlum kiban duh ia hok ban ioh jingmyntoi na katei ka scholarship scheme. U Lat ula pynshlur ia ki khynnah, ba kidei ban long kiba kut jingmut ha ka jingpule ka jongki, ban pyndonkam pura ia ka lad kaba ki ioh na ki sienjam kiba la shim da ka sorkar bad ba kin iakhun tyngeh ban pynurlong ia ka thong bad ia ka jingangnud ka jongki.