Haka District Level Youth Exchange Program ba arsngi halor ka phang “Today’s Youth, Tomorrow’s Leader” ba pynlong daka ophis u District Sports Officer, West Jaiñtia Hills District la sdang yaka hynne ka sngi ha Auditorium ka Kiang Nangbah Govt College, Jowai, daka jingwan shim bynta kumba 10 tylli ki skul ba kynthup lang ki college ka West Jaiñtia Hills haki jait jingiakop bapher bapher. U District Sports Officer uba dei ruh u Asst Director ka Sports and Youth Affairs ka sorkar Jylla u Khroobok Passah haba kren lamphrang u ong, kaba kum kane ka rynsan kala dei ka sien ba lai bala pynlong iaka, bad ka thong hi ka long ban pynshlur iaki samla pule ba kin ioh pyni iaki sap ki phong, nalor ban ia sam kylliang ruh iaki jingstad jingshemphang.
U ong ruh lyngba kane ka prokram bala pynlong haki snem bala leit, la iohi ba ka wanrah shibun ki jingmyntoi, bad kiba jop na kane ka district level kin leit shim bynta haka state level ka ban sa long haka taiew ba nyngkong u bnai November, nangta pat kiba jop haka state kin leit shim bynta haka national level. Ha kane ka sngi nyngkong ki jait jingiakop bala pynlong kynthup ka Solo Folk Song, Solo Folk Dance, group Solo Folk Dance bad Solo Folk song.
La don ruh ka jingpynsngewthuh sha ki samla pule halor ka Skill Development bala wan pynshai da u Lambor Suchen Skill Development Officer, West Jaintia Hills. Lashai ka sngi ba ar pat yn sa don ka jingiakop dro dur, ka iakop leh quiz, thoh poetry, thoh khana, nangta ka science Mela bad kiwei.