Ka jingshah hikai naka bynta ka batch ba nyngkong haba iadei bad ka rukom shna tiar electric batip kum ka Executive Course on Electrical Appliances Repairing Batch kaba hap hapoh ka Raising and Accelerating MSME Performance (RAMP) kaba dei ka skhim lyngba ka ophis jong ka tnat District commerce and industry centre Jowai la sdang iaka haka 23/10/24 ha Bosco Pnar Multipurpose Vocational Training Centre, Jowai. Kane ka jingshah hikai kan dei naka bynta 15 sngi, bad 25 ngut ki ban ioh jinghikai ban pynjanai iaka sap ba kila don lypa. U Fr. Francisco Dhar, Principal, Bosco Pnar haba kren ula kyntu ban pyndonkam iaka jingstad kaba kin sa ioh na kane ka jingshah hikai nalor ban ai sam lang sha kiwei. U Akashdeep Das, SPIU, RAMP u iathuh ba lyngba ka RAMP ynsa sdang
bun kiwei pat ki jait jinghikai ha baroh ki District ka jylla bad lah ruh bad jied da kano kano kaba ki kwah naka bynta ban pynjanai iaka sap.U Eborki Pyrbot, Functional Manager, DCIC ula pynshlur ia kiba shim bynta ba kin long kiba raikut bad sngew skhem haka kam ba ki sdang, nalor ba kim dei ban duh jingkyrmen lada ym iaid iew ka kam namar ba ki dang lah ban jied da kawei pat hapoh ka RAMP. Nangta ula pynshlur ruh ban shim kabu ia kum kine ki lad ai jinghikai ba khlem jingsiew namar ba kim wan barabor. Ha kajuh ka por ula pynkynmaw ruh ban wad ki jingstad thymmai. Bad naka bynta kino kino ki jingiarap ba ki kwah ki lah ban leit mih sha ophis treikam ka DCIC ha kano kano ka por.
Naka liang u P. Toi, Chief Executive Officer, MKVIB pat haba kren u ong, ka jingpyndep iaki jingshah hikai ka iarap iaka lynti ba bha bad miat jong ka lawei. Kumta donkam bha ban jied iaki jait jinghikai ba sngewtynnad ba sngewiahap namar ba don bun ki jait jinghikai bapher bapher. Haka jingialang ba pyniaid u Fr. Abialstar Kharsohtun, Administrator Bosco Pnar, la ioh ruh ka jingkren na u S. Pale, IPO, DCIC, Jowai bad kiwei.