Ka tnad pulit jong ka jylla Meghalaya ka la ioh biang sa 22 ngut ki pulit constable kiba dang pyndep ia ka jingshah hikai ha ka jaka ai jinghikai kaba don ha 4th MLP IRBN Sohpian, kiba kynthup ia 17 ngut ki Recruit Constable bad 5 ngut ki follower. Ia kane la sakhi ruh ha ka Passing Out Parade jong kitei ki 22 ngut ki pulit jong ka batch kaba 9 kaba la long ha katei ka jaka ai jinghikai ha Sohpian WKHD ha kaba ka kong C.A Lyngwa Dy. Inspector of Police (TAP) Meghalaya kala long kum u kongsan bad shim ruh ia ka bynta ban ai khublei ia kitei ki 22 ngut ki pulit.
Ha katei ka sngi la iadonlang ruh Deputy Commissioner ka WKHD, u bah Garod LSN Dykes, u Superintendent of Police ka WKH u B.D Marak, u Commandant ka 4th MLP Batallion u Rupam R Marak bad kiwei kiwei heh pulit ophisar lem bad kiba hap ïing kiba la shah khot sngewbha. Haba kren kum ka kongsan ha katei ka sngi, Ka Deputy Inspector General Of Police (TAP) Kong C.A Lyngwa kala ong ba ba baroh ki recruit constable ha kapor ba ki wan rung sha ka kam pulit
kidei kiba wan na ki jinglong bapher bapher kum ki riew paidbah hynrei hadien 9 bnai ba kila shah pyntbit ha ki jaka ai jinghikai kila kylla long pat ki pulit kiba la bit la biang pura. Shuh shuh kala ong ruh ba lada ki don shibun ne khyndiat hynrei kynmaw ba ka jingshah hikai la ka long ha kano kano ka bynta kadei ban long beit katjuh ia baroh bad ha kajuh kapor kala kyntu ruh ïa baroh ki pulit ba kidei ban long kiba bit ba biang ha ka met ka phad katba ki dang phong ïa ka uniphom pulit.