U Nongialam ka Liangpyrshah hapoh ka Khasi Hills Autonomous District Council (KHADC) u Bah Titosstarwell Chyne hynne ka sngi ula ong, ka District Council ka dei ka nongri, nongsumar bad nongiada bad ban pynneh pynsah ia ki riti dustur, ki rukom shynshar shnong, ki it, ki Hima ba la ai bor da ka Khyrnit ba Hynnriew ka riti synshar ka Ri India. Ia kane u Bah Titos uba dei ruh u MDC ka Sohra constituency ula kren haba jubab ia ka jingkylli, halor ka jingshah Sospon u Syiem ka Hima Mylliem bad nalor ka jingslem ka KHADC ban thung Syiem pura ha Hima Sohra.
Haba kren sha ki lad pathai khubor u Bah Titos ula ong “Na ka liang jong nga, nga sngew ba ngam dei ban ong eiei ia ka kam jong ka executive committee (EC), haba ki sngew dei ban weng, te ngan ong kumno”. U Bah Titos ula ong ba haduh mynta um pat ioh jingtip na kaei ka daw la Sospon ia u Syiem Hima Mylliem bad ula ai ksai ba u lah ban rah ia kane ka mat ha ka Dorbar jong ka KHADC ka ban long shen. “Katkum ka jingsngew jong nga, ka kamram jong ka District Council ka dei ban pynneh bad iada ia ki riti dustur hynrei ha ki jingsynshar, ki shait don ki huri hura, ki kynrum kynram hapoh ki Hima bad kita ki kynrum kynram ki wan na ki Hima ym ba ki wan na ka District Council” ula ong. “Nga ieng haka nongrim ba lada don kano kano ka Hima kaba pyn huri hura, lane don u Syiem uba leh donbor iaki khun ki hajar, um sngap ia ki Myntri te ka don ka lynti ha kaba ka District Council kan sngap ia kita daka don ka jingujor, ka don ka jingshong bishar, ka Show Cause Notice, kumta ter ter” ula ong.
U Bah Titos ula ong ba ki rukom ban weng ia ki Syiem. “Hynrei kam ju don ka khep ba ka District Council kan shu weng beit ia u Syiem uba la jied da ka ilekshon” ula ong. “To ia ki Acting Syiem, te katba sngewmon namar ioh ym ia dei bad no bad no, ki ialeh kumta. Hynrei ia u Syiem ba la jied da ka ilekshon katkum ka riti dustur ha ka jingsngew jong nga ka dei ban kiar ban weng” ula bynrap.
You may also like
-
Kynduh ka ka FKJGP ïa u SDO ba sniew palat ka surok Baridua-Killing
-
Ka AI Job Fair ka thong ban wanrah jingkylla ia ka Meghalaya sha ka ‘AI Valley’
-
Ka MeghGo App kan iarap ia ki nongniah kali bad ki paidbah nongleit nongwan
-
Hiar kynsan ka Helikoptar ha Kongripa, ioh shon dur ei ki longkmie bad Pilot
-
Ha kajuh ka jaka lah ban rep bun ki jingthung, kamai T.8 lak u nongrep jhur ha Garo Hills
