Ka kam ba eh tasam ban kynriah ia ki nongdie madan, ong u Conrad

U Myntri Rangbah ka Jylla u Conrad K Sangma hynne ka sngi ula sam ia ki song pisa sha ki katto katne ngut ki nongdie jingdie madan ba shong ha Brightwell Campus Hawkers Market bad ha SMB Parking Lot, Dhankheti.

Ha kane ka sngi la donlang u Myntri Sorkar u Bah Sanbor Shullai bad MLA East Shillong constituency ka Kong Ampareen Lyngdoh, CEO ka Shillong Municipal Board nalor kiwei kiwei ki heh Sorkar.

Baroh ki nongdie jingdie madan kin ioh mar T.20,000 ha kaba T.10,000 ki la ioh mynta ka sngi bad kin sa ioh biang sa T.2000 na ka bynta 5 bnai lyngba ka skhim CM Urban Livelihood Grant.

Haduh mynta ka Sorkar ka la dep ban pynkynriah ia ki 785 ngut ki nongdie jingdie madan na kylleng ka sor Shillong sha ki jaka thymmai kiba la ithuh ha kylleng ka nongbah.

Kine kynthup 387 ngut ha MUDA Hawker Market Khyndai Lad, 119 ngut ha Polo Hawker Market, 75 ngut ha SMB Parking Lot, Opposite SBI Main Branch, 29 ngut ha PWD Campus, Barik, 138 ngut ha Brightwell Campus Hawkers Market bad 37 ngut ha SMB Parking Lot, Dhankheti.

Haba kren sha ki nongdie jingdie madan, u Myntri Rangbah ula ai khublei ia ki da ka ba ong ba ka jingiatreilang jong ki kala wanrah ia u soh ka jingjop ha kaba ka Sorkar kala lah ban pynkhuid iaki surok synkien, ki lynti iaid kjat bad ki rud surok jong ka nongbah Shillong.

U Myntri Rangbah ula ong ba ka Sorkar ka buh hakhmat eh ia ka ioh ka kot, ka kamai kajih jong ki nongshong shnong bad dei namar kane ka Sorkar ka kloi ban wad ki jaka thymmai ban ailad ia ki nongdie jingdie madan ban bteng ia ka kamai kajih.

“Nga kyntu ia ki samla pule, ki paidbah bad ki nongwan shangkai pyrthei ban wan mad ia ki jingbam ha kane ka jaka thymmai ban kyrshan ia ki para nongshong shnong kamai kajih” la ong u Conrad.

U Myntri Rangbah ula kubur ba ka jingpynkynriah ka long kaba kyllain bha ban ia kaei kaba paw.

“Kane ka lah ban i kum ka kam kaba rit, hynrei ka dei kawei na ki kam kiba eh tasam bha kaba ngi la mad. Kam dei satia tang halor ka roi ka par, ka iasnoh beit beit bad ka kamai kajih jong ki briew bad ka jingitynnad jong ka sor baroh kawei” ula ong.

U Myntri Rangbah ula kren kyrpang halor u Symbud Myntri Rangbah ba khmih ia ka tnad Urban Affairs uba la pynlait ia ka jaka sah jong u na ka bynta ban ai jaka ia ki nongshong dukan madan.

“Ka jaka ba ngi ieng mynta, ka Brightwell Bungalow, ka dei ka jaka sah jong u Myntri ka Tnad urban Affairs. Ka kamai jakpoh ki briew jong ngi ka kham kongsan ia ngi bad kumta, watla ka mut ba u Myntri un hap ban aiti iala ka jong ka jaka sah na ka bynta ki nongshong dukan madan, ula leh ia kata. Nga ai khublei ia ka jingsbun jong u bad ka jingkylluid mynsiem jong u” ong u Conrad.

Ula ong ba ki jaka Sorkar kiba don kongsan eh ha kylleng ka sor lah ai sha ki nongshong dukan madan khnang ban pynthikna ba ki surok kin long ki ba lah ban iaid bad ba khuid khlem da ktah ia ka kamai kajih jong ki.

U Conrad ula pyntip ruh ba ka Sorkar ka thmu ban kyntiew kyrdan ia kine ki jaka shong dukan madan da kaba buh ia ka rynsan iaput iatem ha ka por janmiet, ki jaka leit bar, ki jaka shong, ki jingshai ba la pynitynnad khnang ban ailad ia ka jingshong dukan palat ia ka 7-8 baje janmiet kat kum ki kynta bala shah.

Kum ka dak ka jingai jingiarap, ka Sorkar ka la sam mar T.20,000 sha kine ki nongshong dukan madan ba kynthup ia T.10,000 bala aiti noh bad T.2,000 ka ban sa ai man la u bnai.