Pynkup burom Doctor ka MLCU ia 2 ngut, u Dr Sandi Syiem ka Lifetime Achievement Award

Ka Martin Luther Christian University (MLCU) ka la pynlong ia ka Convocation ba 19 ha ka 11 tarik u Nailur 2026, ha Lariti Performing Centre, New Shillong ban pynkup burom ia ki samla pule ba la pyndep ia ka kyrdan Graduate ban jam sha uwei pat u mawjam ha ka jingiaid lynti ka skulbah. Ha ka jingialan la donlang ki samla pule, ki nongïalam ka skulbah, ki nonghikai, kiba ïing bad ki nongshah khot sngewbha.
Ia ka jingialang la sdang da ka jingrwai National Anthem, ki jingpule na ka Baibl, ka Bhagwad Gita, ka Tripitaka, ka jingduwai ba la ioh ka jingkren pdiang na u Chancellor Glenn C Kharkongor bad ka Report lyngkot ka University na u Vice Chancellor u Ashiho A Mao. La pyllait ruh ia ka shap bad ka motto thymmai jong ka skulbah.
Ha ka jingialang ka MLCU ka la pynkup burom ia u Dr Sandi Syiem da ka khusnam Lifetime Achievement Award, ia ka Honorary Doctorate ia u S K Bose bad ka Honorary Post-Doctoral Fellowship ia u Dr Abdullah Saif Ahmed Al-Sabahi.
Kumjuh la sam khusnam Degree bad ki Diploma ia ar ngut ki samla pule ba la wan shakhmat ka Baiahun Pahsyntiew ha ka MSc Environmental Science bad u Bivek Kumar Singh ha ka Bachelor Tourism and Travel Management.
U Sampath Kumar, IAS, Additional Chief Secretary ka sorkar Meghalaya haba kren kum u kongsan ula ai khublei kitbok kitrwiang ïa ki samla kiba la pyndep ïa ka jingpule bad pynpaw ïa ka jingdonkam ban bei pisa ia ki samla ba dang rit ka thaiñ shatei lammihngi ka ri India, khamtam ïa ki khynnah ba hapoh hynriew snem. U la iaroh ia ka MLCU kaba la kyntiew ia ki samla ha ka pule puthi ryngkat ka jinglong tynrai.
U la kyntu ia ki samla pule ba kin iai bteng ia ka jingpule bad pynkhreh ia lade da ki kor ki bor ba dang mih kum ka Artificial Intelligence bad shimkhia ia ka jinglong ka suin bneng ba kylla stet. Ula ban jur ïa ka jingpynroi ïa ki khynnah rit ha ka jingnang jingstad kum ki nongrim ba kongsan na ka bynta ka roi ka par ha Meghalaya.
Haba kren ha kane ka jingialang pynkup burom, u nongthoh khubor ba pawkhmat u P Sainath ula ong, ka don ka jingkiew ha ka jinglong bym ïaryngkat ha India, kumba la paw ha ki jingïakhih dang shen ha Jantar Mantar bad ki jingjia ba la jia. U la pynpaw ka jingnoh synniang ka nangroi ha ka ri na ka jingkiew ka jingdon ki samla bad ki kynthei na nongkyndong kiba iaid iakhun ia ki jingeh ba dang iai bteng haduh mynta ia ka ioh kam ioh jam.
Haba phai ia ka jingkiew ka Artificial Intelligence ka jingstad thymmai, u Sainath ula maham ba ka jingaiti noh ïa ka jingthoh baroh ha ka AI ka long kumba aiti ïa ka sain pyrkhat bad ki sain dur. U la ban jur ba ka AI kam don akor bad kyntu ia ki samla pule ba kin pyrkhat ia ki jingma kiba lah ban mih na ka jingpyndonkam ia ka. U la maham ka AI ka lah ban ïarap ban pynlong kawei ka ktien hynrei ka buh jingma ïa ka jingriewspah jong ka ktien bad ka kolshor jong ka India, kynthup ïa ki ktien bapher ka thaiñ Shatei Lam Mihngi.
U Sainath ula kyntu ia ki samla pule ba kin buh jingkylli mano ba dei trai bad synshar ia ka AI, mano ba pyniaid ia ka, bad mano ba kitkhlieh ia ki jingma ba mih ha ka imlang sahlang. Ula wer ban ialeh pyrshah ia ki jingbymhok ha ka imlang sahlang kynthup ia ka jingbymdon jaka, ka jingkyrduh bad ka jingpynlang ia ka spah. Haba phai sha ka Preamble bad Directive Principles of State Policy jong ka riti synshar ka ri India, u la pynshlur ïa ki samla pule ba kin ïatreilang rynkat ki nongrim ka jingbishar hok ha ka imlang sahlang, ka ioh ka kot bad ka saiñ hima.
Ia ka prokram la pynphuh pynphieng da ki jingtem bad jingrwai na ki samla pule bad la ioh ban pyllait paidbah ïa ka Special MLCU Cover da ka India Post bad ka jingai khusnam ïa ki samla pule barim. Ia ka India Post cover la ai da u K V L N Murty u Director ka Postal Service Headquarter, Shillong sha u Vice Chancellor u Ashiho A Mao bad kiwei kiwei.