Kem ki pulit Mawkyrwat ia u runar na Gujarat ba ‘Blackmail’ ia ka samla haduh ban pyniap ia lade

Hadien ar bnai ba kawei ka samla na Mawkyrwat, South West Khasi Hills District ka la shim noh ia la kajong ka jingim da kaba sdien phasi, kata, ha ka 19 tarik u Iaiong 2026, ki pulit ka Mawkyrwat ki la kem noh ia uwei u briew na Surat District, Gujarat halor ka jingkynnoh ba u la ‘blackmail’ ne pyntieng pynsmiej bad byrngem ban pynsaphriang ia ki dur bad ki video shimet jong ka lyngba ka Whatsapp bad ka Instagram, kaba la pynlong ia ka ban rai pyniap noh ialade.

U Superintendent of Police ka South West Khasi Hills, u Bah B. Jyrwa u la pyntip ba ia une u briew la tip kyrteng kum u Sachin Nishad (22 snem) uba dei na ka shnong Ambedkar Nagar, Utter Pradesh bad uba trei ruh ha kawei ka jaka ha Surat District, Gujarat.

U SP u la iathuh ba hadien ba la ioh ia ka FIR ba la thoh ba la ujor da ka kong Balapynhun Nongrum na ka shnong Mawkyrwat halor ka jingkynnoh ba ka para jong ka, ka la pyniap noh ialade na ka daw jong ka jingshah pyntieng pynsmiej ba man ka por ha utei u briew uba la byrngem ban pynsaphriang ia ki dur shimet bad ki video jong ka ha ki social media, na ka liang jong ki pulit ki la pynlong ia ka jingtohkit ba mardor. La register ruh ia ka mukotduma ha Mawkyrwat Women Police Station Case No. 04/2026, U/S 77/79/351 (3) /108 BNS, R/W Sec. 66E/67A IT Act.

U Bah Jyrwa u la iathuh ruh ba ha ka jingïaid ka jingtohkit, la lap ïa une u briew uba la shah kynnoh ba u don ha kawei ka jaka ha Surat District, Gujarat bad la ïoh ban kem noh ïa u ha ka 23 tarik u Jylliew, 2026 ha ka por kumba 2:30 PM da ka kynhun ki pulit ka South West Khasi Hills District ba la ïalam da u Investigating Officer, u Inspector J.B. Lakiang ha ryngkat ka jingiarap ki pulit ka Palsana Police Station bad u SP jong ka Surat District, Gujarat.

“Hakhmat ka kynhun jong ngi, une u briew u la phla ruh ba dei ma u uba la leh ia katei ka kam runar bad ia ka mobile jong u, kaba don lut ia kine kiba u la phah, ngi la ioh ban kurup noh,” ong u SP bad bynrap ba ia utei u briew la leit rah ruh hakhmat ka Iingbishar mynta ka sngi.

Ki Pulit ka District ki kyrpad jur ïa ki paitbah nongshong shnong, khamtam ïa ki samla bad kiba shah pyndik ne shah byrngem ha kaba iadei bad ki dur ne ki video shimet, ba kim dei ban shu sngap bad jynjar marwei, ne shim ïa kano kano ka sienjam kaba palat pud namar ba kum kitei ki kam ki long kiba be-ain bad na ka liang jong ki pulit ki long kiba kloi ban iarap bad shimkhia na ka bynta ka hok jong ki. La kyrpad ia kino kino ki briew kiba iakynduh ia kum kine ki jingjia ba kin pyntip mar mar ha ki bor ba dei khmih.

“Ka jingim jong phi ka long kaba kordor. Ka jingiarap ka don, bad ki pulit ki don hangne ban iarap bad kyrshan ia phi,” la ong u SP.