Ka jingialang ki ‘Scouts & Guides’ban kyntiew ka jingiatreilang ha ka imlang sahlang

U Myntri ka tnad Pule Puthi u Bah Lahkmen Rymbui hynne ka sngi, ula plie pyrda ia ka National Level Tribal Meet Scouts, Guides, Rovers & Rangers kaba la pynlong ha Meghalaya State Bharat Scouts and Guides Headquarters, Shillong.

Kane ka jingiakynduh lang ba 5 sngi, ka thmu ban kyntiew ia ka jingpule bad ban sngewthuh kham bha ia ka kolshor, ka jinglong nongialam, ka jingiatreilang kum ka kynhun bad ka jingai jingshakri ia ka imlang sahlang hapdeng ki Scouts bad ki Guides kiba wan na ki jaidbynriew riewlum ki bapher bapher hapoh ka ri.

Lyngba ka jingpynlong ia kiba bun ki prokram bad ki jingiakren, ki nongiashim bynta kin ioh ia ka lad ban ia samlang ia ki jingai jingmut, ki jingmut jingpyrkhat bad ia ki jinglap ka jongki ha ka jingbat skhem ia ka nongrim kum ki Scouts bad Guides, kaba kynthup ia ka jingdon akor, jingai jingshakri, ka jingialong shipara bad ka jingiatylli hapdeng ka jongki.

Ha kane ka sngi plie pyrda la wan ban ia donlang u Assistant Director (Region and State) u M. Sharma, ki nongkitkam jongka Meghalaya State Bharat Scouts and Guides bad ki nongiashimbynta kiba la wan na Rajasthan, Tripura, Arunachal Pradesh, Chhattisgarh, Meghalaya bad na ka North Frontier Railway (Assam).

U Bah Lahkmen Rymbui, ula iaroh ia nongiashim bynta kiba la wan na kylleng ki bynta jong ka ri ba ki don ia ka jingthrang, jingdon akor bad ka jingbatskhem ia ka nongrim bad ia ka mynsiem kaba shisha kum ki Scouts bad Guides.

Ula pynpaw ruh ba ki jaidbynriew riewlum ki la noh synniang bha na ka bynta ka jingkiew bad ka jingriewspah ka ri ha kaba iadei bad ka kolshor bad ki jaidbynriew riewlum kidei ki nongri bad kiba pynneh pynsah ia ka riti ka dutur, kolshor, ktien thylliej bad ia ka mariang bad ula kyntu ia ki samla ba kidei ban sngewsarong ia ka jinglong tynrai ka jongki bad ruh ban pdiang ia ki kabu ha ka pule puthi, ka jingtei ia ki sap ki phong bad ha kaban long nongialam.

U M. Sharma ula pyntip ba ha kane ka jingiakynduh kaba 5 sngi kila don 176 ngut kiba la wan ban iashimbynta bad kane kan long kum ka rynsan ban rakhe ia ka jingriewspah ka ri India ha ka jingdon ia jinghiar pateng ki riewlum naduh ki por hyndai, ka jingdon bun jait ki kolshor bad ka jingiengskhem ha ka mynsiem jong ka jingiatylli lang.