Ki riew donsap ki don kyrhai ha ka thain, ka SAI Centre ka jaka hikai ia ki nongialehkai

Ka Myntri Khynnah jong ka sorkar pdeng ba peit ia ka Tnad Youth Affairs & Sports, ka Raksha Khadse mynta ka sngi ka la leit jurip ia ka Sports Authority of India (SAI) North Eastern Hill University (NEHU) Centre ha Shillong bad iakren bad ki nongialehkai, ki coach bad ki ophisar bad ka la peit bniah ia ki jingdon jingem ia dei bad ka kam ialehkai bad ka jingai jinghikai ha katei ka jaka. Ka Raksha Khadse ka la leit jngoh ruh ki jaka ialehkai bapher bapher bad peit bniah ïa ki rukom ai jinghikai ba dang ïaid shakhmat na bynta ki nongïalehkai ia ki jait jingïalehkai. Ka la iakren bad ki coach bad ki samla nongïalehkai ban pynshlur ban bteng ban ioh ia ka jingtbit, ka jingkut jingmut bad aiti lut. Ka Myntri ka la ïashim bynta ha ki jingïalehkai bapher ha kane ka jingleit jngoh, kynthup ïa ka jingsiat khnam bad ka phutbol bad ki nongïalehkai bad ban jur ka jingdonkam jong ka jingïashim bynta ha ki kam ïalehkai bad ka jingiatreilang ha ki jaka nongkyndong.

Ka Raksha Khadse ka la ban jur ka jingïalehkai ka don bynta kaba wanrah jingkylla ha kaba sain dur ïa ki samla ba skhem jingmut bad ba iaineh ha ka kam kaba long kum ka lad ba khlaiñ na bynta ka roi ka par ha ka imlang sahlang bad ka jingkiew shaphrang jong ka ri. “Ka thain shatei lammihngi ka don kyrhai ki riew donsap ha ka kam ialehkai bad ka kolshor kaba khlain ha ka jingiashim bynta ha ki kam ialehkai. Ka long kongsan ba ngin iai bteng ban pynkhlain ia ki jingdon jingem ban kyrshan ia ki nonghikai bad ki lad ban kyntiew ia ki nongialehkai khnang ba ki samla na ka thain kin lah ban paw ha ki kyrdan ialehkai ha ka ri bad shabar ri,” ka la ong.  Haba ban jur ïa ki jingmyntoi ba kyrpang jong ka SAI NEHU Shillong centre, ka Raksha Khadse ka la ong ba kane ka jaka pule ka don ka lad ban paw kum ka jaka ai jinghikai ba biang ïa ki nongïalehkai. “Kane ka centre ka don ka lad ban ai jinghikai ïa ki nongïalehkai kiba don ha ka kyrdan ba halor tam namar ka jingitynnad ka mariang, ka jinglong jai jai bad ka jinglong ka suiñ bneng kaba sngewtynnad. Lyngba ka jingïai bteng ban kyntiew bad kyrshan, ka SAI NEHU Shillong ka lah ban long ka jaka ai jinghikai ba kongsan na ka bynta ki nongïalehkai kiba pynkhreh ia ki jingïalehkai ha ka ri bad kylleng ka pyrthei,” ka la ong.

Ka la ong ba ki jingïalehkai ym tangba ki kyntiew ïa ka jingkoit jingkhiah ha ka met bad ka jinglah ban ïakhun hynrei ka noh synniang ruh shibun ban tei ïa ki jinglong nongïalam, ka jingïatreilang ha ka imlang sahlang. Kiba donlang ha kane ka jingleit jngoh ki long u Rajnish Mishra, Assistant Director, Sports Authority of India, Bah John Kharshing, Working President ka Meghalaya Olympic Association ryngkat bad ki ki ophisar, ki coach bad ki nongtrei.