Kiba pynkhein ia ka ‘Lineage Act’ kin shah duh jingithuh jaidbynriew Khasi

Ka Khasi Hills Autonomous District Council (KHADC) ka la maham ba ki Khasi ba pynkhein ia ka Lineage Act ki buh jingma ia lade ban duh noh ia ka jingithuh kum ki jaidbynriew Khasi.Ia kane la pyntip da ka Executive Member (EM) ba khmih ia ka tnat Legal Affairs ka Kong Deity H Majaw haba jubab ia ka jingkylli ba la wanrah da ka MDC ka NPP na Nongskhen constituency ka Kong Grace Mary Kharpuri bad Nongialam ka Liang Pyrshah Bah Titosstarwell Chyne. Ka la ong, “Ki briew ba pynkhein ia ki kyndon jong ka Khasi Lineage Act kin shah pynduh noh ia ka jingithuh kum ki Jaidbynriew Khasi”.

Ka kong Grace ka la kylli halor ki sienjam ba la shim pyrshah ia kito ki bym shim jait na ka Kmie hapoh ka Khasi Hills Autonomous District Council (Lineage) Act, 1997 kumba la pynkylla, katba u Bah Titos ula pan jingshai la kane ka Act ka pynkhlain ia ka dustur ban shim ia ka Jait Kmie. Ka Kong Deiti ka la ong ba ka Act, pule lang bad ka Khasi Hills Autonomous District (Khasi Social Custom of Lineage) Act, 2007, ka la kren shai ba ka kyndon 10 ka pynshitom ia kiba pynkhein.

“Kito kiba pynkhein ia ka Act kin shah pynduh noh ia ka jingithuh kum ki Khasi. Kito kiba kyntait ia lade ba ki dei ki Khasi kin shah weng noh na ka jingithuh kum ki Khasi” ka la pyntip hapoh ka Iingdorbar. Ka EM ka la bynrap lada ki Kmie Kpa ki dei ki Khasi, ki Khun ruh ki dei ban long ki Khasi bad pynskhem “Hooid” halor ka jingkylli la ka Act ka pynkhlain ia ka dustur ban shim ia ka Jait Kmie.