T.1,479 klur mang ka 16th Finance Commission ia ka MLRC

U Executive Member (EM) ka Khasi Hills Autonomous District Council (KHADC) ba khmih ia ka tnat Finance  u Seiborlang ha ka sngi sdang ka Dorbar lyiur ula wanrah ia ka mang tyngka ba duna T.16.92 lak jong u snem 2026-2027.Haba wanrah ia ka mang tyngka u EM ula ong, ba ka jingmang pynlut ka long T.214,60,09,410 bad ka jingpynmih pisa ka long T.214,43,16,760.“Nga kular ba ka Executive Committee kan ym sangeh ban wad ia ki lad ki lynti ha ban pynkiew ia ka jingpynmih pisa ka Council, pynjanai ia ka rukom treikam bad bishar bniah ia ka jingpynlut khnang ba kan long kaba iaid beit” ong u Bah Seiborlang.Ula kyntu ia ka Iing dorbar ban mynjur ia ka mang tyngka namar ka Vote of Account ba 3 bnai kan sa kut noh ha ka 30 tarik u Jylliew. “Kumba ngi iatip baroh, ka vote on account ba lai bnai kan kut noh ha ka 30 tarik mynta u bnai, kumta ka mang tyngka ba pura u snem 2026-27 la wanrah hapoh ka Iing dorbar khnang ban lah pyniaid ia ki kam ka council” ula ong.

Shuwa ban batai bniah ia ka mang tyngka, u Bah Seiborlang ula pyntip ia ka Iing dorbar halor ki sien jam ban iada ia ka khyndew ka shyiap ki Raid, Hima bad ki Shnong ki thaw.“Ka Executive Committee ka la shim ki sienjam ban buh da ka kyndon halor ki jaka ka Raid hadien ka jingshem ka jingnang lut ki jaka ki Raid lyngba ka jingai sha ki riew shimet bad ki kompani, kaba la iaid da ki phew hectare. Kane ka buh ha ka jingma ia ka lawei ki pateng ban wan haba ia dei bad ki jaka ban rep lane ban shong ban sah, khamtam na bynta kiba duk bad ba kyrduh” ula ong.“Namar kata, ban iada bad tyngkai ia ki jaka ki Raid, ka Executive Committee ka la rai ban pynjari da ka kyndon ban ai ia ki jaka ki Raid da kaba pynmih ia ka jingpynbna. Kane ka jingpynbna kan treikam mardor hynrei kan ym treikam ia ki jaka ba la thied da ka Sorkar Pdeng bad Sorkar Jylla” ula bynrap. Ka mang tyngka ka tyrwa ban thung ia u Land Recording Officer ba shemphang ha ka GIS ban pyntreikam ia ka DILRMP bad ka KHAD (Regulation and Administration of Land) Act, 2021 hapdeng ka jingnangkiew ki nongaplai ia ka Title Rights Certificate.

Halor ka jingpynmih pisa, u Bah Seiborlang ula ong ba ka Executive Committee ka la pynlait ia ka bilingual pamphlet hapoh ka “Meghalaya Professions, Trades, Callings and Employment Taxation Act, 1947” ban pynsngewthuh ia ki nongsiew khajna, khamtam ha ki Unorganised sector. Halor ka song pisa na ka Sorkar Pdeng, ula pynpaw ba ka 16th Finance Commission ka la mang T.1,479 klur ia ka Meghalaya Rural Local Bodies naduh u snem 2025-26 haduh 2030-31, bad ka bhah ka KHADC jong u snem 2026-27 ka long T.85.50 klur ka ban phiah sha ka Basic bad Performance Grant ba 80:20.U bynrap ba ka Council ka dang ap ban ioh sa T.12.15 klur ha ka installment ba ar jong ka 15th Finance Commission Untied Grant 2022-23. U Bah Seiborlang ula pyntip ba ka Council ka la iasoi MoU bad ka IORA Ecological Salution Pvt na bynta ki kam thung dieng ban pynrben biang ia ki khlaw bad ki carbon project.