Kiew bai bording ilektrik ba pyndait ‘Smart Meter’, ong u paidbah ia u Conrad

U Myntri Rangbah ka Jylla u Conrad K Sangma ula shim bynta jingialang ka “MLA Connect” ha shnong Matchikolgre, Tura hynne ka sngi kum shibynta ki jingpyrshang ban iakynduh bad jingiakren markhmat bad ki paitbah. U Myntri Rangbah ula iakynduh ban iakren ia ki paitbah bad ula shah shkor ia ki jingeh ba pynsngew da ki paid nongshong shnong, halor ki surok, nala, ki jaka leit shabar, ka bording elektrik, ka jingsam um bad ki jingtei ha sor Tura. Ki paidbah ki la pynpaw ki kali lum niut kim lah ban poi sha ki katto katne ki bynta jong ka shnong ha ka por lyiur, namar bym biang ka surok kaba buh jingeh ban lum ia ki niut, u Conrad ula bthah ia ka Tura Municpal Board (TMB) ba kin wad ki lad shipor ban pynthikna ia ka jinglum niut khlem sangeh hapoh ki shnong bad pyndonkam da ki kali 4X4 ha jaka ba longriat. Ki nongialam shnong ki la pynpaw ka jinglong jingman ki skul primary ki bym dei jong ka Sorkar ha shnong ka jingduna ki jingtei kynthup ki kynroh, bording, ka um bad ki painkhana. Ki la kyrpad ban pynioh jaka lehkai ia ki khynnah bad ia ki tiar ialehkai.

U Myntri Rangbah ula kular ba un sa peit bniah ia ki jingeh na bynta ban ai ka jingiarap. Ka seng samla ka la kyrpad ban shna madan ialehkai Basketball bad kiwei ki jingtei. U Myntri Rangbah ula kular ban iarap kum ki tiar tem bad ki tiar ialehkai ia ki Youth Club ban pynshlur ia ki samla ha ka kam ialehkai bad pynneh ia ka kolshor. Ki nongshong shnong ki pynpaw halor ka jingkiew bai bording elektrik naduh ba pyndait Smart Meter, na ka liang ki ophisar ka MeECL ki la pynshai ba mynshuwa ka jingai bai bording la pynshong nongrim katkum ka jingpyndonkam ha u Smart Meter bad kam long kumba mynshwa kaba shu antad ia ka jingpyndonkam ia ka bording elektrik. La pyntip ka tnad ba peit kan leit jurip la sngi Nyngkong halor kane bad lada ki dei kiba shisha ne lap bakla kin sa pynbeit mardor.

U Myntri Rangbah ula kyntu ka jinglum ia ka Census ne Khanasamari ka long kongsan bad ki paidbah ki dei ban shimbynta khamtam ki longiing ba duna ka jingioh bad ki longiing BPL namar ki jingtip ba thikna ki donkam ban pynwandur ne ka ‘Planning’ ia ki skhim na bynta ka bha ka miat bad ki lad jingmyntoi na ka Sorkar.