Buh mawnongrim u Conrad ki project kam pynroi ba T.150 klur ha Tura

U Myntri Rangbah ka Jylla Conrad K Sangma mynta ka sngi ula buh mawnongrim ia ki project kam pynroi ba kot palat T.150 klur na ka bynta ka sor Tura.

Kine ki kynthup ka jingpyntrei thymmai ia ka Najing Bazaar, kynthup ka jaka pynieng kali, ka hotel bad jaka ban shong dukan madan, ka jaka pynieng kali ba bun kyrdan & cinema ha Dakopgre, ka ban ngiam haduh 200 tylli ki kali, ka cinema hall ba don lai tylli ki screen, ki jaka ialehkai bad jaka bam bad pynbha ia ka SMRLC Building, kynthup ka lynti iaid kjat da ki jingdro halor ki Mattithaw bad Deiriti (Arts &Culture Promenade) ba don bad ka Museum, ka park, ka CM Youth Centre bad ka jaka na ka bynta ki tynmen.

Ha kane ka jingialang la donlang u CEM ka GHADC, MDC, Chairman ka Tura Municipal Board JD Sangma, ki Ophisar ka Tnad urban Affairs, ki nongmihkhmat na ki Shnong, nongialam Shnong, ki barikor bad ki nongshong shnong na ki kyntoit bapher bapher.

U Myntri Rangbah ula plie lai tylli ki mawnongrim ki project kam pynroi ha sor, ka jingtrei ba thymmai ha Najing Bazaar, ka jaka pynieng kali ba bun kyrdan bad ka cinema complex ha Dakopgre bad ka jingshna pynbha ia ka SMELC complex.

Ula sam ruh ia ki cheque sha ki barikor hapoh ka Chief Minister Artist Engagement Scheme ban kyrshan ia ki samla ba don sap ka thain bad pynlait ruh ia ka Tura Municipal Board Mobile Application ban pynjanai ia ka jingai jingshakri ban wanrah ka jingkhuid bad kyntiew ia ka jingtreikam da ki kor digital.

Ka jingialang ka la sakhi ruh ia ka jingpynbna ia ka jingai kyrdan ia ki shnong ha ka liang ka jinglum niut, bad ai syrnot bad mementos sha ki Shnong kiba jop ha ka jingpyrshang ban wanrah ia ka jingkhuid, nalor ka jingpynbna ia ka project street light ha ki shnong ki thaw bad ka jingsaw ia ki shithi mang tyngka ban pyndait ia ki kor CCTV na ka bynta ban pynkhlain ia ka jingshngain u paidbah bad ki jingtei ha kylleng ka sor Tura.

Haba ai jingkren, u Myntri Rangbah Conrad K Sangma ula ong ba ka synshar khadar ka dei ban iai long beit kaba buh hakhmat ia u paidbah bad kaba pynshong nongrim na ki jingiakren ba khlem sangeh bad ki nongshongshnong. Ula ong “Ka CM Connect ka dei ka buit bala wanrah halor kane ka jingthmu- ba man ki nongshongshnong ki dei ban ioh ka lad ban iakren beit beit bad ka Sorkar”.

U Conrad u pyntip ba ka Sorkar kala iaid ban pyndonkam pura noh da ki kor digital ha ka jingshakri ia ki paidbah ban pyn thikna ia ka jingtreikam bha, ka jingsted, bad jingshai haba pynshlur ia ki nongshongshnong ba kin synniang lem ia ki lad ki lynti haba iadei bad ki jingeh ba ka Sorkar ka iakynduh.

Haba kren halor ka jingpynkylla dur ia ka sor Tura, u Myntri Rangbah ula ong ba ki jingpyrshang ba iai bteng ha kine ki phra snem bala leit kala synniang lypa sha ka jingpynitynnad ia ka sor, katba kiwei ki kam ki dang iaid shaid shaid. U ong ‘Ha kine ki phra snem, ka Sorkar kala wanrah ia ki skhim bapher bapher ban pynitynnad ia ka sor Tura. Ngi dang don ha ka lynti kaba jngai ban iaid hynrei lyngba da ki jingpyrshang ba iai neh, ka Sorkar kan iai bteng ban pynbha ia ki jingdon jingem bad kynshew ha ka ban pynroi ia ki jingtei.

Haba kren halor ki jingtei kiba heh bala wanrah, ula ong ka Najing Bazaar Redevelopment Project kala ioh ia ka mang tyngka ba T.60.76 klur bad kan pynkylla ia ka jaka sha ka Iew iadie iathied kaba heh (commercial hub) ka ban don ia ki dukan kiba la shna bha, ki jaka pynieng kali, ki jaka shong duan madan bad ki jaka leit bar ki paidbah.

Ula pynpaw ruhn ba ka jaka pynieng kali ba bun kyrdan (Multi-Level Car Parking) bad ka Cinema Complex haDakopgre, kaba la mang T.51.21 klur, kan weng ia ka jingkhapngiah jong ka Sorkar. U ong ba kane ka jaka pynieng kali kan long ia kumba 200 tylli ki kali nalor ki lai tylli ki cinema hall kiban don mar kumba 125 tylli ki jaka shong, ka jaka bam bad jaka ialehkai nalor kiwei kiwei.

Halor ka jingshngain ka sor, u CM ula pynbna baa duh 552 tylli ki LED streetlight ba don bad ki Smart Control System yn sa pyndait ha ka jinglut ba T.6.51 klur, ka ban pynleit jingmut eh ha ki jaka kiba dum, ki jaka iew, ki lynti iaid kjat, bad ki lynti iaid ki khynnah skul. Ula pynpaw ba yn nang pynbun ruh ia ka jingpyndait kor CCTV ha sor Tura ka ban long kumba 300 unit bad kumba 500 tylli ki camera.

Kawei na ki bynta kiba kongsan jong ka prokram ka long ka jingialang jong ka CM Connect, ha kaba ki nongshong shnong ki la pynpaw ïa ki jingud jingnam bad ki jingeh halor ka roi ka par beit beit hakhmat jong u Myntri Rangbah bad ki heh OPhisar, kaba pynskhem ia ka jingkut jingmut jong ka Sorkar ia ka synshar khadar kaba ïashim bynta lang u paidbah bad ka jingai jingshakri kaba buh da ka por ban pyndep.