Rai ka sorkar ban pynkrynriah nongdie madan na surok bah Shillong-Dawki

Ka Sorkar Jylla ka la rai ban pynkynriah noh ia ki nongdie madan harud surok ha Right of Way (RoW) jong ka surokbah Shillong-Dawki ba dang shu shna thymmai, da kaba kdew ba ka jingdon kiba shong die madan ka wanrah ka jingma ba khraw ia ki paidbah bad ia ka iaid ka ieng jong ki kali.

Ia kane ka rai la shim ha ka jingialang ba la pyniaid da ka Deputy Commissioner (Revenue) ka East Khasi Hills ka Kong RM Kurbah ha ka 15 tarik Jymmang.

Ia kane ka jingialang la khot hadien ba u Manager (P), ka NHIDCL, PMU-Mylliem, u la pynpaw ia ka jingsngewkhia halor ka jingdon kiba shong die jingdie ha bun tylli ki jaka naduh Rilbong Point haduh 31 Mer Shiteng bad 7 Mer Upper Shillong.

U Manager ula pynpaw ruh ia ka jingsngewkhia halor ka jingbuh ia ka jaka pynieng kali ha Rilbong Point.

“Namar ba kane ka jingkyntur pud ha surokbah ka lah ban wanrah jingma kaba khraw ïa ki paidbah, ki nongdie jingdie kumjuh ruh iaka jingïaid ki kali, ha ka jingïalang la rai ba ki Ophisar tnad Pulit, ka PWD (Roads), NH Division Shillong bad ka NHIDCL ki dei ban ïatreilang ban pynkynriah ïa ki nongdie jingdie haka Sngi Thohdieng”.

Ban pyntreikam ia katei ka hukum, la bthah ia ka NHIDCL ban buh dak ha RoW.

Ka Ophis Superintendent of Police (Traffic) kan buh ia ki dak bala mana ban ieng kali hapoh ka bynta RoW bad ban buh ia ki pulit ha ka jaka.

“Ka jingïalang ka la rai ruh ba ka NHIDCL, PWD (Roads) NH Division, bad ki Pulit kin ïatreilang ban weng iaki nongdie jingdie hadien ba la dep ai jingtip sha baroh” ong ka kyrwoh.

Ka surokbah Shillong-Dawki ka dei ka surok kaba kongsan bad ki heh Sorkar ki la ban jur ba ka jingkyntur pud ka pynthut iaka iaid ia ieng ki kali bad ka buh jingma ïa ki nongleit nongwan.