Ka Executive Committee (EC) jong ka Khasi Hills Autonomous District Council (KHADC) hynne ka sngi, kala pynmih ia ka hukum ba ka Suspon ia u Paiem Ainam Manik Syiem kum u Syiem ka Hima Mylliem katba dang pynlong ia ka jingtohkit bad la thung bujli ia u Bah Alban Fedrick Syiem kum u Acting Syiem ban pyniaid ia ki kam jong ka Hima Mylliem.
Ha ka hukum kaba la pynmih da ka EC jong ka KHADC kala pynbna ba kala ‘Suspend’ ia u Paiem Ainam Manik Syiem kum u Syiem ka Hima Mylliem, katkum ka bor kaba la pynkup lyngba ka Section 7 jongka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong Syiemship) Act, 2007.
Ka la pynbna ruh ba la thung ia u Bah Alban Fedrick Syiem kum u Acting Syiem ka Hima Mylliem ban pyniaid ia ki kam jong ka Hima bad kane ka hukum kan treikam noh mardor bad kan iaineh tad haduh ban da la pynmih da kumwei pat.
Katkum ki jingtip ba la iohlum la iathuh ba ka dawbah jongka jingshah suspon u Bah Ainam Manik Syiem kum u Syiem ka Hima Mylliem kadei halor ka jingbym siew ia ka khajna kaba 10% sha ka District Council na ka bynta u snem mang tyngka 2022-23, 2023-24 bad 2024-25 katkum ka Section 11(5) jongka Khasi Hills (Establishment, Management and Control of Markets) Regulation Act, 1979.
La pynpaw ba u Syiem ym shim la siew ia ka bhah khajna kaba dang sahteng kaba 1/8 sha ka Council kaba kot kumba T.3,24,85,020,625 na ka bynta u snem mang tyngka 2018-19, 2019-20, 2020-21, 2021-22, 2022-23, 2023-24 bad 2024-25 katkum ka kyndon 9 jong ka Sanad.
Ka KHADC kala pynpaw ba ka jingleh u Syiem bym siew ia ka khajna kadei ka jingpynkhein ia ka aiñ, ki kyndon treikam bad ki kyndon jong ka sanad kaba long ka jingpynkhein kum u ophisar jong ka Council bad ka paw ruh ba kala don ka jingpyndonkam bakla kaba la palat pud ia ka bhah kaba 10% na ka jingioh nong na ka iew bad kumjuh ruh ia ka bhah kaba 1/8, kumta ka Council kala shim ia ka rai ban Suspon noh ia u Syiem katba ka dang iaid ka jingtohkit bad yn sa ioh pat ia ka lad ban iasaid hakhmat jong u ophisar uban pynlong ia ka jingtohkit.
You may also like
-
Rai ka sorkar ban pynkrynriah nongdie madan na surok bah Shillong-Dawki
-
Ki paidbah kim dei ban khuslai ia ka umphniang ha Meghalaya, ong ki Kompani
-
Ai jinghikai ka DREAM ia ki khynnah ba pep skul shiteng por ban lait na u drok bad sengkam lajong
-
Da ki kor Digital yn lum jingkhein Khanasamari 2027, palat 8 hajar ki nongshim jingkhein
-
Shen yn iakren u Conrad bad u MR ka Assam ban sdang iakren pynbeit pud