Kular u MR ban pynioh ki skhim shuh ha Nongstoin nalor ki kam pynroi ba la plie

U Myntri Rangbah ka jylla Meghalaya, Conrad K. Sangma, ha ka sngi Balang ula leit jngoh ïa ka West Khasi Hills District bad ula pynlong ïa shibun ki prokram bad jingplie paidbah ïa ki projek kiba kongsan ban kyntiew ïa ka roi ka par ha ka thaiñ.

Ha kane ka jingleit jngoh, u Myntri Rangbah ula sdang da kaba iakynduh bad ïakren bad ki paidbah kiba don harud surok hajan Ïew Nongstoiñ bad hadien kane, ula leit ban plie paidbah ïa ka Dorbar Hall ba thymmai jong ka shnong New-Nongstoiñ, kaba long ka jingtei kaba kongsan ban ïarap ïa ki kam shnong bad ki kam synshar shnong.

La synran ia myntri rangbah da u MLA ka Nongstoiñ bah Gabriel Wahlang, u MLA ka Rambrai, u RG Momin ryngkat ka jingïadonlang u Srally Rashir, MDC ka Mawshynrut uba dei ruh u Rangbah Shnong ka New Nongstoiñ, ka Deputy Commissioner ka West Khasi Hills ka Hema Nayak, u Superintendent of Police Bah Herbert Kharkongor lem bad kiwei pat ki ophisar.

Shuh shuh, hadien kane u Myntri Rangbah u la plie paidbah ruh ïa ka Prime Hub ha Pyndenglawar bad ïa ka ophis ba thymmai jong ka Nongstoiñ C&RD Block, kiba long ban pynkhlaiñ ïa ki kam pynroi shnong ha ka District.

Ha ka liang ka pule puthi, u Conrad K. Sangma u la plie paidbah ruh ïa ka Mawïeh RMSA School, ban kyntiew ïa ka pule puthi ki samla pule ha katei ka thaiñ.

La pynkut ia katei ka jingleit jurip lyngba ka jingpynlong ia ka CM Connect Programme ha shnong Ksehkohlong, ha kaba u la ïakynduh ïa ki paidbah ban sngap ïa ki jingeh jong ki bad ban bishar ruh ïa ki mat iatai ba la mih na ka jingiaphylliew jingmut lyngba katei ka rynsan paidbah.

Haba ai jingkren ha ka jingïalang plie ia ka Dorbar Hall jong ka shnong New Nongstoin ha katei ka sngi, na ka liang jong u Myntri Rangbah ka Jylla u la ong ba u sngewkmen ban ïohi ba ki paidbah ha ryngkat ka sorkar lem bad ki nongïalam khlem da ïa sngew party ne sngew saiñ pyrthei kila ïasnoh kti lang ban shakri na ka bynta ka Jylla bad ka Hall kaba stai ka long ka nuksa halor ka jingiatreilang.

Shuh shuh u la ong ba ha ki 8 snem bala leit ka sorkar MDA kala ïohlad ban shakri ïa u paidbah ka Jylla bad ka thong jong ka sorkar ka long ba kan nym ïeh shadien ïa kano kano ki District, bad ki thaiñ bad kane kam long kaba suk bad u la ong ruh ha ki 8 snem bala leit tang ha WKH ka sorkar kala lah ban theh haduh kumba 120 tylli ki projek kam pynroi kaba kot haduh kumba1,315 klur.

U Myntri Rangbah u la pynbna ruh ba ka sorkar kala mang pisa haduh 27 klur na ka bynta ban tei ïa ka Convention Center hapoh Nongstoiñ bad ïa ka jingtrei la khmih lynti ba kan sa sdang noh shen hapoh jong u ne u snem 2026.

Haba kren halor katei ka bynta u Myntri Rangbah u la pynpaw da kaba ong ba ka sorkar ka angnud ba manla ki District Headquarter kidei ban don ïa ka Convention Center bad kumjuh manla ki District Headquarter kidei ban don ïa ki jingtei kiba paka na ka bynta ki jingïalehkai sports.

Katba ha kaba ïadei bad ki jingtei na ka bynta ki kam ïalehkai sports ha Nongstoiñ u Conrad u la ong ba na ka liang jong u MLA ka Nongstoiñ u la phah ïa ka jingtyrwa ka jong u sha ka sorkar na ka bynta ban pynïoh ïa ka madan phlang plastic kaba 9 klur shiteng bad nga la peit bniah ïa ka jingtyrwa jong u MLA, hynrei u la ong ba ïa kane yn sa dang iakren bniah bad u MLA ryngkat ki paidbah nongshong Shnong khnang ba yn lah ban tei ïa ka madan phlang ha ryngkat u synthetic track bad hapoh mynta hi u snem yn sa mang pisa noh.