Jurip u MLA ia ki surok kum ka jingpynkhreh Synod 2028

U MLA ka Mawkyrwat, u bah Renikton L Tongkhar mynta ka sngi u la leit ban jurip ia ki jaka bapher bapher ha ka shnong Rangmaw bad Domjyrti na ka bynta ban shna ia ki surok bad ki jaka ieng kali kum shi bynta ban pynkhreh ia ka jingwan jong ka Jingiaseng Samla Khasi-Jaintia Presbyterian Synod Sepngi ha u snem 2028 hapoh ka Balang Presbyterian Rangmaw bad kumjuh ka Youth Assembly jong ka Balang Church of God (Meghalaya & Assam) kaban long ha ka Balang Church of God Rangmaw ha katei hi kajuh ka snem.

Ha kane ka jingleit jurip, la synranlang ia u MLA da u Myntri ka shnong Rangmaw, u Bah D. Lyngdoh, ki dkhot ka Executive Committee jong ka Dorbar Shnong Rangmaw bad ka shnong Domjyrti nalor ki ophisar na ka tnat PWD (Roads) bad ki Tymmenbasan bad kiwei de ki nongialam balang na baroh ar tylli ki Balang, kata, ka Balang Presbyterian Rangmaw bad ka Balang Church of God Rangmaw.

U Bah Renik u la leit jurip ïa ki jaka bapher bapher ha baroh artylli ki shnong da ka jingthmu ban shna ïa ki surok bad ki jaka ieng kali ban pynthikna ba kan ym don kano kano ka jingdheng kali ha ka por ba pynlong ïa kitei ki ar tylli ki Jingiaseng heh.

Haba iakren bad ki lad pathai khubor, u bah Renik u la pyntip ba haduh mynta ym pat don satia ki surok kiba pyniasoh ia ka shnong Rangmaw sha katei ka jaka ba la jied ban pynlong ia ka Jingiaseng Synod bad ka jingthmu jong katei ka jingleit jurip ka long ban leh survey bad ban shna ia ki surok sha katei ka jaka.

U la pyntip ruh ba ka jingthmu jong u ka long ban pynthikna ba dei ban don ym duna ïa ka ar tylli ki jaka rung bad ar tylli ki jaka mih sha katei ka jaka long Jingiaseng, kata, na ka bynta kito kiba wan na East Khasi Hills la kajong bad kiba wan na West Khasi Hills District ruh la kajong bad kumjuh ruh na ka bynta ki jaka ieng kali bad kane kan pynthikna ïa ka jingïaid beit ïaid ryntih jong ki kali.

Halor ka jingai jingmut jong ki riew rangbah ka thain bad hadien ka jingiakren bad ki ophisar ka tnat PWD, na ka liang jong u mynta u la pynkhreh ban phah kawei ka ‘proposal’ ban shna kawei ka surok naduh na Rangmaw ban poi ha Jingkieng Wah Umngi. U la ong ruh ba kane ka surok kam dei eh tang na ka bynta kane ka Jingiaseng Synod, hynrei kan kylla long ruh kawei na ki surok ba donkam tam hapoh ka thain ha kaba ki briew na ki shnong kum ka Nonglang, Mawten bad ki thain War kin iaid lyngba kane ka surok haba ki leit sha Shillong bad ka jingjngai ruh kan iapher haduh kumba 6-7 KM eiei ban ianujor bad ka surok na Mawkyrwat-Jakrem haduh Wah Umngi.