Ka projek ha Lumpongdeng ka jingkyrkhu ia ka Meghalaya

Katba kiwei ki iapyrshah da kaba pyni bun ki daw ia ka jingpynkhreh ka sorkar ban tei ia ka hotel rem dor ha Umiam, uwei na ki riew Rangbah uba dei ruh u Social Activist u bah Disparsing Rani, ula pynpaw ba u ai ka jingkyrshan ia ka jingwan ka Taj projek ha u Lumpongdeng,Umiam.U bah Disparsing Rani, ula ong ba ka jingwan kane ka projek kadei ka jingkyrkhu ia ka jylla Meghalaya bad kan long ruh ka lad iohkam iohjam ia kiba bun ki briew ka jylla, namar ba haduh mynta ym pat don ki nongbei pisa kiba shim ia ka jingsngew ba don ka jingiohnong ban pyllut ha kano kano ka jaka.“Kum u riew shimet bad kum u Social Worker, nga sngew ba ka jingwan jong kane ka projek kadei ka jingkyrkhu ia ka jyllla. Ha ka jingiohi jong nga, ka jingdon ki Taj Hotel ki dei ki kynja Hotel kiba la long 5 star ne 7 star,” ula ong.

Ha kajuh ka por, ula kynthoh ruh halor ka jingkren jong kiba bun ba kane ka Lumpongdeng kan kylla sha ka Spa ne ka jaka khem met.Ula ong ba ha ka jingsngew jong u, ka Spa kadon bun bun jait ki rukom khem naduh ki Chinese, ki Indian. Hynrei ka jingkhem kam mut ban poi sha uta u pud ban wanrah sha ka kam awria.“ Ha ka jingsngew jong nga kata ka Spa kan ialam sha ka kam awria, ka long ka bym iahap bad ka bym lah ban pdiang hakhmat ka ain namar ka kam awria ym pat ithuh da ka ain. Kata kadei tang ka jingkynnoh jongno re jongno ki bym pat sngewthuh ia ka lynti haba iadei bad kane ka Spa,” ula ong.Shuh shuh haba iadei bad ka jingsngewkhia jong kiba bun ba ka jingwan kane ka projek ka lah ban ktah ia ka jingkhuid ka mei mariang, u bah Disparsing ula ong ba kane ka projek kam dei ka karkhana hynrei kadei ka projek kaban iarap ban kyntiew ia ka ioh ka kot ha ka kam jngohkai. Namarkata kan ym don ka jingpynjaboh ia ka mariang bad ki rukom shna ki wan ha kata ka rukom ban pynneh ia ka mariang bad kin ym pynduh ia ki dieng ki siej, ki sawdong sawkun ka jaka.

“Nga kyrshan ia kane ka projek namar kadei ka lad iohkam iohjam ha kaba kin sa don da ki 3-4 lak ngut kiban iohkam. Ha jylla jong ngi, haba wan ki karkhana ngim tbit ban trei hynrei haba wan ka kam jngohkai ki briew lajong ki la lah ban trei hi. Ki briew ki lah ban iohkam ha ki bun ki liang kynthup naduh ki nongniah Lieng, ki nongrep,” ula bynrap.Halor ka jingkren u Symbud Myntri Rangbah ka jylla u bah Prestone Tynsong ba kan ym don ka jingpom ia ki dieng ki siej, ula ong ba kane ka long ka bym lah ban pdiang namar ym lah lait hi bad kan don hi ki dieng ba hap pom. Ula ai nuksa ia ka ophis ka NPP bad ka surok Four Lane ha Upper Shillong ha kaba ka la don ka jingpom dieng hynrei haba pom uwei u dieng, lah ban thung da ki phew tylli ki dieng.