Ka seng Indian National Congress (INC), lyngba ka West Khasi Hills District Congress Committee, mynta ka sngi ka la pynlong ïa ka jingïalang kyrpang ha Congress Bhavan Nongstoiñ kum shibynta ban pynkhlaiñ ïa ka Party. Ha kane ka jingïalang la wan ban ïashim bynta da ki nongkitkam kiba kongsan kynthup ïa ki nongmihkhmat na Mawshynrut, Rambrai bad Nongstoiñ Block Congress Committee, ryngkat bad ki nongïalam rangbah na ki lai tylli ki constituency jong ka West Khasi Hills.
Ïa ka jingïalang la pynïaid da u bah Eric Kharsyntiew, President ka District Congress Committee, ha ryngkat ka jingïadonlang u bah G. Ningstar Marthong, u bah JTS Thongni bad u bah Kodang Rashir. Haba kren sha ki lad pathai khubor u bah Eric Kharsyntiew, president ba thymmai ka WKHDCC ula ban jur ïa ka jingdonkam ban ïatylli lang u paidbah bad ula ong, ba ka seng Congress ka dang long ka bor kaba khlaiñ ha ka Ri ban iakhun pyrshah ïa ka rukom synshar donbor jong ka Bharatiya Janata Party (BJP).
Ula ong ruh ba hapoh ka jingïalam jong u Mallikarjun Kharge bad Rahul Gandhi, la dep ban thung thymmai ïa ki nongïalam ha ka district bad ha ki block. Ula bynrap ba ka seng ka la leit jingïakynduh ïa ki paidbah ha ki shnong ban sngewthuh ïa ki jingeh jong ki, bad ka Party kan ym pynbor ïa ki paidbah ban thep vote ia ka Congress, hynrei ka kyrpad ïa ki ban ai jingkyrshan lang haba ka seng ka ïakhun na ka bynta ki jingeh jong ki ha ka jylla bad ha ka ri hi baroh kawei.