Kyntait ki nonghikai bad nongtrei ki skul bad Kolej Deficit ia ka pension skhim 2026

Ki nongialam bad ki nongmihkhmat jong ki skul bad ki college bapher bapher kiba hap ha ka Deficit grant-in-aid ha ka jylla, ki la kyntait ia ka Meghalaya Non-Government Schools and Colleges Employees Centralised Fund Scheme, 2026 kaba wanrah ka sorkar dang shen.

Haba kren sha ki lad pathai khubor hynne ka sngi, Ka Dr BH Buam, ka Assistant Pfofessor ba la shongthait bad u babu Boswell Pala u President ka KJDSTA kila ong ba la iathir ia ka Draft Pension Scheme 2023 bad kane ka kam, ka la don ruh ha ka kashari.

Hynrei kaba lyngngoh ka long ba watla kane ka kam ka dang don ha ka kashari, ka sorkar jylla ka la pynmih pynban ia ka jingpynbna ia ka pension scheme 2026 kaba thymmai bad dang shen ka sorkar ka la bthah ia ki nonghikai bad kiba trei naduh kiba la shongthait ruh ban plie ia ka Permanent Retirement Account Number (PRAN) hapoh kane ka pension scheme thymmai bad kane kan ktah ia ka pension scheme kaban ktah ia ka hok jongki.

Ki la ong ba kito kiba rung kam shwa u Iaiong 2010 ki ioh pension katkum ka Meghalaya Non-Government Schools and Colleges Employees Centralised Provident Fund Act. 1969 katba kito kiba rung kam hadien, kin ioh ia ka National Pension System kumba la pynbna ha Jymmang 2023 hynrei kane ka Pension Scheme 2026 kam shym la don ka jingpyniapher katkum ka ain.

Halor kane, kila kyrmen bad ngeit skhem ba ka kashari kan ai ia ka jingbishar hok bad kila kyntu ia ka sorkar ba kan leh katkum ki kyndon ain na ka bynta ka jingbit jingbiang ki nonghikai, ki nongtrei kiba dang don ha ka kam bad kiba la shongthait ha ki skul bad college kiba hap ha ki deficit grant in-aid, kiba la aiti ia ka jingshakri ha ka pule puthi.