Leit jngoh ka Committee on Subordinate ia ka Iing Dorbar Meghalaya

Ka Committee on Subordinate Legislation jong ka iing dorbar thawain ka jylla Bihar ka la pynlong ka jingialang bad u Lamphang ka iing dorbar thawain ka Meghalaya hynne ka sngi bad ia ka jingialang la pyniaid da u Lamphang ka iing dorbar thawain ka jylla u Thomas A. Sangma.

Haba kren ha kane ka sngi, u lamphang dorbar u Thomas A. Sangma ula ong, ba ka Bihar Committee on Subordinate Legislation kaba wan jngoh ia ka jylla Meghalaya bad ka la leit jngoh ruh ia ka iing dorbar thawain ka jylla Meghalaya. Ula pynpaw ka jingsngewkmen ban pdiang ia ka kynhun bad batai ba ka jingiatreilang hapdeng ki ar tylli ki komiti ka long kaba donkam ban iasam ia ki jingtip kiba ai jingmyntoi hapdeng ki ar jylla.

U Lamphang ula pyntip ki dkhot ki la ïakren halor ka jingtreikam ki Committee on Subordinate Legislation mynta ha la ki jong ki iing Dorbar Thaw Aiñ bad ki la ïasam jingmut halor ki rukom thaw aiñ, ki rukom treikam ba bha tam. Ki dkhot na baroh ar tylli ki Jylla ki la ïasam ïa ki jingshem jong ki bad pynlong ïa ka jingïakren kaba tei na bynta ka bha ka miat.

U Sangma ula pynpaw ka kynhun ba wan jngoh ka la shimkhia ïa ka ka rukom treikam ka Ïingdorbar Thawaiñ ka jylla Meghalaya bad ka kynhun na Bihar ka pynpaw ka jingsngewtynnad ïa ka jingwan sha Meghalaya bad ka ioh jingtip ba kham shemphang na ki jingïakren kiba ai jingmyntoi.

Ka Committee on Subordinate Legislation ha ki Iing Dorbar Thawain ki long kiba kongsan ki treikam ha kylleng ki Dorbar Thawain ki Jylla ri India. Ka kamram ba kongsan ka long ban bishar bad ai kaiphod sha ka Iing Dorbar hato ki bor ba la aiti da ka Iing dorbar thawain bad kiwei ki ain ki pyntreikam ne em katkum ka kyndon ka riti synshar ka ri.

Ia ka kynhun na Bihar la ialam da u Chairman ka Committee on Subordinate Legislation u Manohar Prasad Singh kynthup ki dkhot u Chinmay Atit Singh, Murari Mohan Jha, Pankaj Thakur, Sujit Kumar, Abidur Rahman bad u Aasif bad la synran da ki ophisar kynthup u Suraj Kumar, Pankaj Kumar Rai, Shubham Kumar, u Abhishek Kumar bad Chandan Kumar Jaiswal.

Ia ka Meghalaya Committee on Subordinate Legislation la mihkhmat da u Chairman, u bah Gavin Miguel Mylliem ryngkat bad ki dkhot kynthup u DrMizanur Rahman Kazi, u Damanbait Lamare bad Secretary ka Meghalaya Legislative Assembly, u Malthus S. Sangma ki ophisar ka Assembly Secretariat.