Lum ka sorkar ia ka jingialang ‘High-Level’ halor ka SDG

Da ka jingiakhun ban pynurlong ia ki Sustainable Development Goal (SDG), ka Sorkar Meghalaya ka la lum jingialang jong ka High-Level Capacity-Building Workshop hynne ka sngi ha State Convention Centre ban iatai halor katei ka mat.

Ia kane ka jingialang la pynlong da ka Tnad Planning, Investment Promotion & Sustainable Development, ka Sorkar Meghalaya da ka jingiatreilang bad ka Indo-German Green and Sustainable Development Partnership (GSDP-GIZ), ha kaba kiba donbyntalang ha ka kam ban khmih bniah ia ki rukom pyntreikam sted ia ki SDG kiba iaid ryngkat bad ka jingbuh hakhmat ka jylla ia ki kam pynroi.

Haba kren ha ka jingialang u Commissioner & Secretary uba khmih ia ka Planning Development u Dr Vijay Kumar D, ula batai ia ka rukom treikam bala pynbeit ryntih jong ka Jylla na ka bynta ka Sustainable Development Goal (SDG) ne ka thong jong ka roi ka par kaban iaineh.

U la ong “Ngi la pynkha ia ki SDG Cell ha baroh ki District, la thung ia ki District Research Fellow bad shna ruh ia ka Grassroot Data Network lyngba ka Village Date Volunteers bad ka Jylla kala nang pynheh ia ka CM Catalytic Fund ban pynbha ia ki jingmih na ka SDG, ha kaba man la ki district mynta kin ioh ia ka ‘Grant’ kaba kot haduh T.1.5 klur na ka bynta ki kam kiba la bhah ban leh ne pyntrei.

U ne u heh ophisar ula ong ba ka thong jong ka Jylla ka long ban wan ha ka kyrdan top 10 hapoh ka Ri ha ka SDG hapoh u 2030 bad ha ka Per Capita Income hashuwa u 2032.

Katba u Secretary (PIP &SD) R Nainamalai ula pyniasnoh ia ka jingiaid lynti lang ka SDG bad ka ‘Viskit Meghalaya” Vision, kaba buh thong ban kynjoh ia ka ioh ka kot ba $10 billion hapoh u 2028 bad $100 billion hapoh u 2047.

Ula ong ba ka jylla Meghalaya kadei kawei na ki katto katne ki Jylla kaba pyntreikam ia ka mang tyngka kaba don jingiadei bad ka SDG ha kaban pynthikna ia ka jingmih na ka roi ka par kiba lah ban shim jingkhein bad ka Meghalaya kala iai bteng ban pynneh ia ka kyrdan ban lah treikam bha ha ka NITI Aayog SDG Index.