Ka jingkhang tih dewiong ka ktah ia ka kamai ka jih ki paidbah

Ka MLA jong ka NPP na Sutnga-Saipung constituency ka Kong Santa Mary Shylla ka la ong ba ka East Jaiñtia Hills ka dang leit biang sha u snem 2014 namar ka jingbteng ban khang tih dewïong ka la pynthut ïa ka kamai kajih jong ki hajar tylli ki longïing bad ka la kyntu ïa ka Sorkar Jylla bad Sorkar Pdeng ban thaw ïa ki kyndon na ka bynta ka rukom tih dewïong ba iahap bad ki nong shong shnong jong ka thaiñ.

Ka Kong Santa kala ong ba ka rukom tih dewiong katkum ka juk stad mynta (Scientific Mining) daka Open Cast ka long kaba rem dor bad ka buh jingeh iaki paidbah khamtam kito kiba don par dewiong ba rit.

“Ka East Jaintia Hills ka shaniah pura ha u dewiong, baroh ngi shaniah beit ha u dewiong ban kamai ja kpoh” la ong ka Kong Santa bad bynrap ba ki briew ki ia kynduh ia ka jingeh kaba jur ha ka liang ka pisa tyngka bad ka kyntu iaka Sorkar ban pynsted iaki kyndon tih katkum ka juh stad mynta kaba iahap bad ki paidbah ka thaiñ.

Ka la ong ba ki nongshong shnong ki la phah ia ki jingthoh sha u Myntri Rangbah bad baroh 2 ngut ki Symbud Myntri Rangbah hadien ka jingialang paidbah ha ka 7 tarik Iaiong da kaba kdew ba ki jingaiwai iaki jaka ban tih daka juk Open Cast ka long kaba rem dor palat bad iahap bad ki nong shong shnong.

“Namar ba ngi la leh ïa ka jingtih dewiong kaba naduh hyndai, ki briew ruh ki kwah ïa kata ka juh ka rukom kumba la leh mynshwa, ngi hap ban ïohi ïa ka lad kaba bha tam bad kata kaba kham tad, kata kaba ki paidbah ki kwah” ka la ong.

“Ka ktah ia ka kamai kajih jong ki paidbah naduh u snem 2014 naduh ba khang daka NGT. Hynrei ka dei ka ktah mynta kham sniew namar ka long kumba ngi leit phai biang sha u snem 2014” kala ong.

Ka MLA ka la ong ba ka Sorkar ka la lah ban pynbor iaka Sorkar Pdeng ban shah biang ban tih dewiong ha Meghalaya naduh u snem 2018 bad ka la jop hynrei ban pyntreikam ia ka, ka jinglut ka long arshah bad ka buh jingeh iaki trai par dewiong kiba rit.