Na Risiang sha Finland bad Sweden wanrah burom u Donald Marthong, Pynkup burom ka ALO

Ka All Lyngngam Organisation hapoh ka jingïalam u Dr. Bostick Mawsor President rangbah jong ka seng mynta ka janmiet ka la pdiang burom ïa u heprit Donald Marthong uba la wan poi mynta ka sngi ha sor Nongstoiñ hadien ba u la ïoh ban leit mih khmat ïa ka Ri India sha bar Ri lyngba ka jingïalehkai Football, ha kaba ka kynhun jong utei u heprit ka la rah ruh haduh 2 tylli ki nam lahduh na ki lympung jingïalehkai Football kiba heh hapoh Finland bad Sweden.

Katei ka seng da ka jingkmen ka la ap lypa ha sor Nongstoiñ bad mar sien hiar utei u heprit ka seng ka la ïoh ban pynkup burom da ka jaiñ ryngkat u syntiew, u Kpieng bad ha kajuh ka por ka seng ka la ïoh ban ïa pajut kti bad utei u heprit da ka song pisa bad la ong ba katei ka jingleh jong ka seng ka long kum ka dak kaban ai mynsiem ïa ki heprit ka thaiñ khnang ba kin nang shlur shuh shuh ban minot ha ki jingïalehkai bapher bapher.

U president u la ong ba ka la long ka jingsngew sarong ïa ka thaiñ namar wat haba utei u heprit udei uba na ka shnong Risiang kaba dei tang ka shnong kyndong na ka thaiñ Maweit West Khasi Hills District hynrei kaei kaba utei u heprit u la leh ka la wanrah ïa ka burom ïa ka shnong ïa ka thaiñ ïa ka jylla bad ïa ka Ri India hi baroh kawei, kumta ka seng kam lah khlem da wan ban pliang burom ïa utei u heprit uba dei hok ban ïoh ïa ka jingpdiang burom.

Kumban shu pyntip ba ka Minerva Academy FC kaba na ka jylla Punjab naduh ka 6 tarik u Naitung 2026 ka la leit ban ïashimbynta sha ka Ri Finland bad ka rah shi syndon ïa ka nam lahduh ïa kawei ka lympung kaba la tip kum ka Helsinki Cup of Finland, ym tang katta hynrei katei ka club jong kitei ki heprit kaba kynthup ïa u Mekhamkhraw Nongrem na Mairang bad u Donald Marthong na Risiang, kiba na ka jylla Meghalaya ki la jop ruh sa ïa kawei pat ka lympung kaba la tip kum ka Gothia Cup ha ka Ri Sweden ha kaba ha katei ka lympung ruh ki la rah ïa ka nam lahduh kiba dei ruh ki lympung kiba heh duh ha kitei ki baroh 2 tylli ki Ri.

Kum ban shu bynrap khyndiat lah ruh ban ong hangne ba wat la ka Ri India kam shym la kot bor ban poi ïashimbynta sha ka lympung baheh duh ka pyrthei ne ka World Cup hynrei ka jinglah jong kine ki club jong ki heprit kiba na ka Ri India khlem pep kan pynïoh mynsiem shibun ïa kiba ieid Football ban don ka jingkyrmen ba ha kawei ka sngi ka Ri India jong ngi ruh kan sa kynjoh ne poi sha ka World cup.