Mynjur ka sorkar 10 ki mat jingdawa bad weng kam 47 ngut kiba pyllait tuh jingkylli eksam NEET

Ka National Testing Agency (NTA) ka la pynkhreh ka jingpynkylla ban pynthikna ka jingiaid beit haba pynlong ia ki eksam bapher bapher bad kane ka long hadien ba ka Sorkar Pdeng ka la weng kam haduh 47 ngut ki nongtrei.

Ia kane ka rai la shim kum shibynta ka jingpyrshang ha ka ri baroh kawei ban pynneh ia ka jingshaniah ha ki eksamin ba la pynlong ha ka ri, hadien ba la mih ki jingkynnoh ba don ka jinglait tuh ki jingkylli eksamin NEET-UG ha une u bnai, kaba la lam sha ka jingiakhih ki samla pule ha kylleng ki Jylla.

Ia kane ka rukom khmih bniah la phai khmat ruh sha ka thain shatei lammihngi ka ri, ha kaba da ki lak ngut ki samla pule ba shaniah ha ka National Entrance Examination ban ioh ia ka admission ha ki college kiba tbit.

U Myntri Rangbahduh ka Ri u Narendra Modi ula pynthikna ia ki samla pule ba kito kiba donkti ha ka jingleh tuh ia ka eksam kan ym don jingmap bad ka ieng skhem ha ka jingkular ka Sorkar ba kan ym iapeiñ, ka bym shah liang bad ka khuid ka suba ha ka rukom pyniaid ia ki eksam.

Ha kawei pat ka liang, ka Kynhun Myntri ka Sorkar Pdeng ka la mynjur ia ki 10 tylli ki jingtyrwa ban wanrah da ka ain ban tehlakam ia ki jinglait tuh ki jingkylli hapoh ka ri, da kaba pynsajia haduh 10 snem ia kito kiba donkti ban leh thok ia ki eksamin. Ki nongleh bakla kin mad ia ka jingshah pynsajia hapoh ki kyndon ki kam runar da kaba iasuhbuit.

Hapoh jong katei ka kyndon aiñ ba la tyrwa, kino kino ki riew shimet ne kynhun ba donkti pyllait tuh ki jingkylli bad ak kum kiwei pat ki briew ne pynjulor ia ki kor digital (digital tampering) kin mad ia ka jingshah pynsajia ban siew kuna haduh T.10 klur.

Kane ka jingthmu ban wanrah jingkylla, ka dei kawei na ki sienjam ban shimkhia hadien ka jingbitar ki samla pule bad ki paitbah ia ka jingleh tuh ia ki eksamin bad ban wanrah biang ia ka jingshaniah hapdeng ki phew lak ki samla pule, namar ka lawei jong ki kan shong ha ka rukom pynlong ia ki eksam kiba iaid beit khlem ka jingleh tuh.