Wer u bah Kyrmen Shylla ia ki samla ban shim bynta ha ka synshar khadar

U MLA ka United Democratic Party (UDP) na Khliehriat constituency u Bah Kyrmen Shylla ula wer ia ki samla ka Jylla ban iashim bynta ha ka synshar khadar da kaba ong ba ki samla ki dei ka lawei jong ka Jylla Meghalaya.

Haba pynpaw ba ki samla ki dei kiba kongsan u Bah Kyrmen ula ong, “Ki samla ki long kiba kongsan ha man la ki bynta, ym tang ha ka por ilekshon. Ki la ju don bad kin iai dang don bynta”.

U bynrap ba ban weng ia ka jingkyrduh kam donkam ia ka jingiatreilang hapdeng ka Sorkar bad ki samla.

Da kaba kdew ïa ka jingïalam lynti jong u Myntri Rangbah ka Jylla u Conrad K Sangma, u Bah Kyrmen ula bynrap ba ka jingkhang jong ka Sorkar ka plie na bynta ki jingai jingmut halor ka jingwad ki lad lynti ki ban kyntiew ia ka ioh kam ioh jam.

“Kane kam dei tang ka jingthmu jong nga ne ka jingthmu jong ka UDP. Ka dei ka jingthmu jong ka Jylla bad ka imlang sahlang. Kam long kaba suk ban ai lad ïa baroh haba kheiñ ïa ka jingbun ki samla jong ngi, hynrei ngi dei ban ïai pyrshang” u la ong.

“Lada ki samla jong ngi ki don jingmut, kaba bha ka long ban leit beit sha u Myntri Rangbah ka Jylla ha ryngkat bad ki jingai jingmut kumno ban thaw kam kham bun na bynta ki samla bad ia baroh lang” u la bynrap.

Halor ka jingthmu jong ka UDP ban khring shuh shuh ia ki samla, u Nongialam ka UDP ula ong ba ka Party ka ju iakynduh bad ki samla man ka por.

“Ngi tip ba ki samla ki dei ka mynta bad ka lawei hynrei ngim dei ban iehnoh ia kiwei pat, ngi kwah ban pynthikna ba ki samla kin ioh jingkyrshan bad ki lad ban iai kiew shakhmat” ula bynrap.