Nga kloi ban long U ‘langknia na bynta ka jaidbynriew: ong Ardent

Ka Voice of the People Party (VPP) ka la pynpaw ka jingsngew kyndit halor ka jingbyrngem ka seng be-ain ka Hynniewtrep National Liberation Council (HNLC) ban pyniap ia ki nongialam ka party. U President ka VPP u bah Ardent Miller Basaiomoit ula ong, kum ka party ka pynrem jur ia kane ka jingbyrngem pyniap ka seng HNLC ia ki nongialam ka party. U bah Ardent ula ong ba ka HNLC kam don hok ban tuklar ia ka jingtreikam jong ki ha District Council hynrei dei tang ki paidbah kiba lah ban bret ia ki na District Council namar ki dei ma ki kiba la jied ha District Council. “Ngi kwah ban ong hangne ka HNLC kam don hok ban tuklar ia ka jingtreikam jong ngi ha District Council, dei tang u paidbah uba lah ban bret ia ngi na District Council, lada ka shem ba ka jingtreikam jong ngi ka long pyrshah ia kaba ngi la kular ia u paidbah,” ong u bah Ardent ha ka video ba ula pyllait hynne ka Lah sngi u Blei. U bah Ardent ula ong ruh baroh ki tip ia ka jingshisha ba ki don shibun ki kynrum kynram ha ka Hima Sohra bad ka party VPP ka don ia ka jingthmu ban wanrah ia ka synshar ba khuid naduh ki shnong ki thaw, ki hima bad ha ka jylla hi baroh kawei. “Haba ngi dei ka bor ban peit ia ki shnong ki hima, ngi kwah ban leh ryntih bad leh janai bad ngim kwah ban leh kyrkieh ia kano kano ka kam ba iadei ha ka synshar khaddar ha ka shnong ka thaw lane ha ka hima. Namar ka thong jong ngi, ka long ban wanrah ka synshar kaba khuid ha ka jylla,” ula bynrap.

Ula ong ba lada ka jingbyrngem ka HNLC ban pyniap ia ki nongialam ka party bad kumjuh ia u kum u nongialam ka VPP, kan wanrah ia ka bit ka biang ka shongsuk shong shngain bad ka jingmyntoi ia ka jaibynriew, u long uba kloi ban long u langknia na bynta ka jingmyntoi ka jaidbynriew. Ha kajuh ka por ula ong, ba ka jingbyrngem ka HNLC kan long ka kabu kaba khraw ia kito kiba don ka jingthmu ba sniew ia ki nongialam jong ka VPP. Kumta ka HNLC kan nym lah ban lait na ka jingkitkhlieh ne ban sait khuid ia lade lada don kano kano ka jingjia kaba sniew ia ki nongialam jong ka VPP. U bah Ardent ula ong ruh ba kum u nongialam u kwah ban pynpaw ba hadien kane ka jingshah byrngem un nym wad ki lad jingiada na ki bor pulit ne na ki bor sorkar. “Kum u nongialam nga kwah ban pynpaw ba hadien kane ka jingbyrngem ngan  nym wad ki lad jingiada na ki bor pulit ne na ki bor sorkar, namar nga tip ba ka jingim bad ka jingiap jong nga, ka shong ha u Blei uba nga shakri uba long u nongthaw jong nga kumba u Dabid u ong, ‘Shisha la nga iaid ha them ka syrngiew ka jingiap ngan nym sheptieng ia kaba sniew, namar me don ryngkat ma me bad nga, u diengduh bad u shanduh jong me ki pyntngen ia nga’, ong u bah Ardent”

Ula ong ba kum ka party kam don kano kano ka jingthmu ba sniew pyrshah ia ka jaidbynriew hynrei ki don tang ka jingangnud ban wanrah ia ka lawei ba shngain ki longdien man dien. Ula buh ruh ar tylli ki jingkylli ia ka seng HNLC, “Kaei ka jingkwah ka HNLC, Hato ka kwah ban pynphai biang ia ka synshar Syiem ha kane ka jylla bad hato ka kwah ba ngin lait noh na ka ri India?.” Kine ki jingkylli ka HNLC ka hap ban batai shai sha u paidbah, ong u bah Ardent. Ula kyntu ruh ia ki paidbah ba kim dei ban rit mynsiem bad kum ki nongialam ka party ki la mad shibun ki jingbyrngem ha ki por ba mynshwa hynrei kin nym kynran dien ban iaid ha ki nongrim kaba beit kaba biang na bynta ki longdien ka jaidbynriew.