Palat 5 hajar ki ioh jingiarap shna ïing baduk ha Nongstoin Block

Ka Pradhan Mantri Awaas Yojana-Gramin (PMAY-G), kaba dei kawei na ki skhim jong ka Sorkar Pdeng ban ai jingïarap pisa ïa ki longïing kiba duna ha ka ïoh ka kot ban shna ïing shna sem, ka la long shisha ka jingkyrkhu kaba khraw ïa bun ki longïing kiba ym kot bor ban shna ïa la ki jong ki ïing. Kane la pynpaw ruh lyngba ki katto katne ngut ki nongïoh jingmyntoi kiba la mih shakhmat ha ka jingiakren bad ki nongthoh khubor.
Katkum ka jingïoh lum jingtip, nyngkong eh ïa kane ka skhim la tip kum ka Indira Awaas Yojana (IAY) shuwa ba yn pynkylla noh sha ka Pradhan Mantri Awaas Yojana-Gramin (PMAY-G) ha u snem 2016.
Katkum ka thup lum jingtip lyngba ka ophis BDO, ka pyni ba naduh u snem 2008 haduh 2016, haduh 1,712 tylli ki longïing ha Nongstoiñ Block ki la ïoh jingmyntoi lyngba ka IAY. Hadien ba la pynkylla sha ka PMAY-G naduh u snem 2016 haduh 2024, sa 4,073 tylli ki longïing ki la ïoh ïa katei ka jingïarap. Kumta baroh, palat 5,700 tylli ki longïing ki la ïoh jingïarap pisa ban shna ïing ha Nongstoiñ Block hapoh kine ki 16 snem ba la leit noh.
Haba ki nongthoh khubor u la ïakren bad ki katto katne ngut ki nongïoh jingmyntoi, ki la pynpaw ba ki la ïoh pura ïa ka pisa kaba ki dei hok ban ïoh bad kim shym la shah thok ne shah pynduna ei ei ïa ka jingïarap. Kane ka pyni ba ka jingpyntreikam ïa kane ka skhim ka la ïaid beit ïaid ryntih bad khuid ha ki bynta bapher bapher jong ka thaiñ, kynthup ïa ki Block jong ka Nongstoiñ, Mawshynrut bad Rambrai.
Lah ban kdew ba mynta ka jingïarap hapoh ka PMAY-G ka long T.2.5 lak shi ïing, bad ïa kane ka jingïarap la ai ha ka kyrteng jong ka longkmie ka longïing. Ka jingpyntreikam ïa ka skhim ka ïaid ryngkat ryngkat bad ka jingïatreilang jong ki bor shnong ban pynthikna ïa ka jingkhuid bad ka jingïaid beit jong ka skhim.