Pyllait u Conrad ia ki bos ilektrik, shen ki Myntri sorkar kin iaid da kali ilektrik

U Myntri Rangbah ka jylla u Conrad K. Sangma hynne ka sngi ula pyllait paidbah ia 3 tylli ki bos ilektrik hapoh ka skhim PM eBus Sewa Scheme. Ka jingpyllait paidbah ka kine ki bos ka long na bynta ban kyntiew ban ai jingshakri ba biang ia ki paidbah ha ka leit ka wan, ban pynneh pynsah ban pynjyrngam ia ka mei mariang, kan iarap ban pynduna ia ka jingpynmih lyer jakhlia bad kan pynkylluid ruh ia ka nongbah Shillong. Kine ki bos ba pyllait thymmai ki long kiba la pynbiang lut bad ka lyer pyngngad ki AC bad ki long kiba lah ban iaid kumba 180 haduh 200 kilometer tang da kaba shu charge tang shisien. Man kawei ka bos ka lah ban shong haduh 25 ngut ki briew kynthup u draibar bad ki don ruh ki jaka shong kiba bit ba biang bad la shna ia kine ki bos ruh na bynta ka jingbit jingbiang ki briew kiba don jingduna ha ki dkhot met kiba pyndonkam da ka wheelchair.Haba kren ha kane ka sngi u Myntri Rangbah u Conrad K. Sangma ula ong ba ka rukom leit ka rukom wan jong ki paidbah ka long kawei na ka jingeh ba khraw tam ha nongbah Shillong.

Ula Conrad ula ong ba mynta ka sngi la pyllait paidbah tang 3 tylli ki bor bording bad shen yn sa pyllait paidbah sa 47 tylli ki bos bording. Kine ki bos ki dei kiba la shna pynwandur ha kata ka rukom ban shngain bad ha kaba ki paidbah ki lah ban shaniah.“Ka jingthmu  jong kane baroh ka long ban pynkylluid ia ka nongbah bad ban pyntikna ba ki paidbah ki lah ban pyndonkam da kine ki bos ban ia kaba ki pyndonkam ia ki kali shimet khnang ban lait na ka jingkhapngiah bad kan long ka jingmyntoi ia baroh,” ula ong.Shuh shuh ula bynrap ba suki suki ka ophis treikam sorkar ruh yn sa pynkynriah noh sha ki jaka treikam ba thymmai, khnang ban ailad ban pynkylla ia ki jaka barim ban pyllong ki jaka ba jyrngam ha kaba ki paidbah ki lah ban iaid ban ieng kylluid.Ha kajuh ka por, u Myntri Rangbah ula pyntikna ba ka sorkar ka dang treikam na bynta ban pynthymmai ia ka polisi ka zero-tax policy na bynta ki kali bording ban pynlong ia ki kaba biang bad kaba bit ban pyndonkam hapoh nongbah.

Shuh shuh ula bynrap ba ia kine ki kali bording, yn sdang ban pyni nuksa da kaba pynbna ba baroh ki Myntri sorkar bad ki heh sorkar shen kin pyndonkam ia ki kali bording.Katba na ka liang u Dr. Vijay Kumar D, IAS, Commissioner & Secretary ka tnad Urban Affairs ka sorkar jylla, ula ong ba kine ki bos ki long kiba bit ba biang na bynta ka mariang, ki don ia ka jingpyndait ia u GPS, ka AC, kaba la ioh lyngba ka skhim jong ka sorkar pdeng ka PM-eBus Sewa scheme. Ula ong ba hapoh kane ka skhim, kin sa don 50 tylli ki bos electric ba thymmai kiban sa treikam lyngba ka ka Gross Cost Contract (GCC) model.