Katba nangiaid ki sngi ki por, ka Shad Suk Mynsiem ba ju pynlong man u snem da ka Seng Khasi Kmie ka la nangheh bad nangïar da ka jingïashim bynta shitrhem ki ‘rang bad ‘thei sotti na uwei u snem sha uwei pat.
Ia ka Shad Suk Mynsiem 2026, la pynlong naduh 11 tarik haduh 13 tarik Iaiong ha Madan Weiking Shillong bad la sakhi ka jingwan shim bynta da ki spah ngut ki paitbah kiba dang bat ia ka niam tynrai kynthup ia kiba dang samla haduh kiba la rangbah ki la iashim bynta ha ka jingshad da kaba bud ryntih ia ki jingsawa ba mih na ki ksing bad tangmuri ban ai nguh ia u Blei uba la theh sei ia ki jingkyrkhu.
Ha ka sngi ba lai ka Shad Suk Mynsiem la wan shim bynta haduh 1810 ngut ki nongshad, kata 964 ki shynrang bad 846 ngut ki kynthei ha ryngkat ka jingwan sakhi lang ki hajar ngut ki khun jong ka Seng Khasi.
Haba kren sha ki lad pathai khubor u vice president ka Seng Khasi Kmie, u Rgh PD Nongrum ula pynpaw ka la don ka jingkiew ha ka jingwan iashim bynta jong ki samla naduh ki heprit ba dang 5-6 snem ka rta bad ula ong, “Nga dap da ka jingsngew sarong ba ki samla ki la sngewthuh ia ka jingkongsan ban pynneh pynsah ia ka riti dustur bad ia ka kolshor khamtam haba ki la tip ba ngin lah ban pynneh pynsah ia ka jinglong kyrpang jong ka jaidbynriew lyngba ka kolshor bad ka niam ka rukom”.
Ha kaba ia dei bad ka jingsngewkhia halor ka kyrdan rit paid, u Rgh Nongrum ula ong, “Rit paid ka dei ka kyntien ba ia dei bha. Ngi ngim pynleit jingmut than ia kata, ngi trei na ka bynta ban pynneh pynsah ia ka kolshor bad ngi trei sha kata ka bynta ban pynlong ia ki samla ban sngewthuh ia ka jingkordor ban iada ia la ka jinglong tynrai lyngba ki riti dustur bad lyngba ka niam”.
Ha kaba ia dei bad ka jingkylla niam ula ong, “Ka riti synshar ka ri, ka ai ia ka lad ba laitluid ban bud ia kano kano ka niam. Ngi long kiba sngewkhia bha bad phah ia ka kyrwoh sha ka jaidbynriew ka jong ngi, sha la ki jong ki samla ba phi don ia la ka jong ka kolshor, phi don ia la ka jong ka riti ka dustur, phi don ia la ka jong ka niam. Balei ngin leit ban pdiang ia kaei kaei kaba long kaba nabar ri (foreign) ia ngi?
U Rgh Nongrum ula ban jur, “La hikai ia ngi ban burom ia kiwei bad ban ieid pat ia la ki jong. Lada ngi lah ban trei halor kane, kane ka kyrwoh kaba suk, kaba nga burom ia phi bad phi phin burom ia nga. Nga ieng thoiñ ha kaei kaba nga ngeit skhem bad phi phin ngeit skhem ha kaei kaba phi ngeit. Ngin ia im da ka jingsuk”.
Ula maham ba ka long kaba don jingma ban don ia ka jingngeit ba kawei pat ka niam ne long halor ia kiwei pat, da kaba ong, “Lada phi pyrkhat ba ka jingngeit ka jong phi ka long kaba kham bha shuh shuh ban ia ka jong nga ne ka jong nga ka kam bha shuh shuh ban ia ka jong phi, kane ka dei kaei ka kynrum kynram ka kan sdang bad ka niam kan pyniaphiah”.