12 tylli ki shnong ha Jirang Block ki lait na ka jingpang TB

Shibynta ka jingiai bteng ban iakhun pyrshah bad ban rat dyngkhong ia ka jingpang Tuberculosis, mynta ka sngi ka tnad District Tuberculosis Control Society ka la rakhe ia ka programme TB Mukt Bharat da kaba sam da ki syrnot sha ki 12 tylli ki Shnong kiba bym don ki nongpang TB hapoh ka Jirang C &RD Block ia kaba la pynlong ha ka ophis u BDO ka Jirang Block.

Ha kane ka programme ban ithuh kyrpang ia ki Shnong kiba lait na ka jingpang TB, la wan ban donlang da u Myntri Sorkar Jylla u ba dei ruh u MLA ka Jirang Constituency u Bah Sosthenes Sohtun, u Dr. P Hajong, BDO, ka Dr. E Kalwing, District Tuberculosis Officer, ka Dr. K Lyngdoh, Incharge ka Patharkhmah CHC, ki Rangbah Shnong nalor kiwei kiwei ki ophisar.

Ha kane ka sngi, na ka liang ka DTCS ka la ioh ruh ban sam ia ki jingbam tei met na bynta kito ki nongpang TB kiba dang don hapdeng ka jingsumar ha ki shnong bapher bapher.

Na ka liang u Bah Sosthenes Sohtun, ula pynpaw ia ka jingkmen ban sakhi ba ki don ki Shnong kiba la lait na ka jingpang TB hapoh ka Jirang Block, da kaba ai khublei bad jingiaroh ia ka jingtrei shitom jong ki bor ka tnad Tuberculosis bad ka jingiatreilang ki bor pyniaid shnong.

Ula ong ruh, ba ka thong jong ka sorkar pdeng hi ka long ban pynduh jait noh ia kane ka jingpang TB da kaba thaw ia shibun ki programme ba ka tnad Tuberculosis lem ka ophis u DC, BDO bad kiwei kiwei ki la nang rung sha man ki Shnong ki thaw ban lum jingtip bad ai jinghikai bad ki lad jingiarap kumno ban iada na kane ka jingpang.

“Ka jingiatreilang hapdeng ki bor ka tnad ka Koit ka Khiah, ki tnad sorkar bapher bapher, ki nongmihkhmat paidbah ki riew treimon sngewbha bad ki Dorbar Shnong ka long ka lad kaba khraw ban kot sha ka thong bad ban iarap ia kito kiba don hapdeng ka jingsumar na kane ka jingpang”, ong u Bah Sohtun.