Ka Shillong ka pawnam naduh por synshar ki phareng, hynrei kam don shlem hikai thohdur ban kyntiew ia ki barikor ka jylla

Ka World Art Day Celebration 2026 lane ka Rakhe Sngi Mattithaw Satlak Pyrthei la pynlong ha iing u Lat ka Jylla ia ka lyngkhuh sngikha jong u barikor bakhraw tam ha pyrthei u Leonardo da Vinci ha ka 15 tarik Ïaiong, 2026. La rakhe ruh ia ka jingrwai shitrhem jong ka Ri India ba ju tip kum ka Vande Mataram ka ban dap shispah sanphew snem mynta ka snem 2026.

U kongsan ha kane ka rong ka taw u Bah Charles Pyngrope, Lamphang barim jong ka IingDorbar Thawaiñ ka jylla Meghalaya ula kren pynkhie rasong ia ka thohdur ha jylla da kaba ula nam ia ka nongbah Shillong bad ka jylla Meghalaya kum ka dur ba miatdur tam ha pyrthei ba lah ban sien syntiew ia ka thohdur ba paka bad pura.

Kiwei kiwei ki kynrem lyndan kiba ai jingkren ha kane ka sngi rakhe Mattithaw Satlak Pyrthei ki long u Bah FR Kharkongor, Principal Secretary ka tnad Arts and Culture ka jylla, u Manaj Saha, President ka International Association Art India, u Biplap Roy, Brand Ambassador jong ka Association, u R.V. Warjri, IFS, Adviser ka Meghalaya Chapter bad u Bah Raphael Warjri, State Coordinator jong ka Meghalaya Chapter ryngkat kiwei kiwei ki kynrem lyndan bad ki barikor jong ka jylla.

Hadien ka jingrakhe la plie ia ka shlem pyninam ia ki dur thoh jong ki sawphew ngut ki barikor na jylla bad na kylleng ka Ri India da u kongsan Bah Charles Pyngrope ha ka jingiadon lang ki kynrem lyndan bad ki barikor ka jylla.

Ka jingkren ba kongsan ka long na u khliehduh ka International Association Art India, u Bah Manaj Saha uba la kdew ia ki jingdonkam jong ki barikor katkum ka jingtbit jong ki na ka bynta ban kyntiew ia ka thohdur bad mattithaw ha jylla bad ha ka thaiñ Shatei Lammihngi ka Ri India.

Ula ban jur ba ban pynkhreh noh shaid shaid na ka bynta ban seng ia ka shlem hikai thohdur bad ki shlem pyninam na ka bynta ba ki barikor na jylla ba kin lah ban kiew irat bad ka pyrthei baroh kawei.

Haba kren shaphang ka nongbah Shillong kaba la kiew rasong ha baroh ki liang bad kaba la rim tam na ki nongbah naduh ba dang synshar ki phareng haduh da ioh laitluid ka Ri India. Hynrei ula bynñiaw pat ba wat tang kawei ka shlem hikai thohdur ym pat lah ban seng ha jylla bad kumjuh ia ki shlem pyninam na bynta ban kyntiew ia ki barikor batbit na jylla.

U Bah Raphael Warjri ula kam ba ki jingpyrshang na ka por sha ka por ki la iaid hapdeng byllai ki dieng pyngkiang ba khlem lah ban pynurlong haduh mynta. Kumta u kyrmen ba lyngba ka International Association of Art-India kan wanrah ki jingkylla ha jylla ha ki por ki ban wan.

Kum shibynta ka jingrakhe Sngi Mattithaw Satlak Pyrthei la pynlong ruh ia ka jingkren na ki akhia ha ka mattithaw bad Thohdur ba kynthup ia ka Dr. Meghali Goswami, Assistant Professor Kala Bhavana, Visva-Bharati University, u Shovin Bhattacharjee, Dr. Prakash Kishore bad Arak M. Sangma kiba la kren ban sam jingtip ia la ka jingtbit ha la ki kam thohdur bad ki jingtip shaphang ka thohdur bad mattithaw ha jylla, ryngkat ka jingshim bynta jong ki barikor ban ia syllok bad pashat la ki jingtip ha kiba bun ki bynta na bynta ban kiew rasong ka thohdur ha jylla bad ha ka Ri India baroh kawei.

La ioh ruh ka jingrwai myllung ban iaroh ia ka meirilung meirisan kum ka kmie jong ka Ri India ba tip kum ka ‘Vande Mataram’ da ki kaitor hapoh ka jingialam jong I Kong Silbi Passah kaba la pynkhie im ia ka mynsiem ieit shitrhem ia la ka Meirilung Meirisan ha Ri India baroh kawei.