Ym tip u Myntri ba jah u Pharmacist 2 snem ha CHC Nongklaw

U Myntri ka tnat ka koit ka khiah ka Sorkar jylla u bah Wailadmiki Shylla ha ryngkat u Myntri ka tnat Bording u bah Metbah Lyngdoh uba dei ha kajuh ka por u MLA ka Mairang Constituency ha ka 30 tarik u Ïaiong, 2026 ki la leit ban jurip ïa ka CHC Nongkhlaw bad ki la ïoh ruh ban shong jingïalang bad ki nongtrei ka Hospital. U bah Wailadmiki ula ïathuh ba ki don shibun ki jingdonkam hapoh ka Hospital khamtam ka jingduna ki nongtrei hynrei na ka liang ka tnat ka koit ka khiah ka la shimkhia bha ïa kane kam.

Haba kylli halor ka jingbym wan trei u pharmacist mynta la 2 snem kumba kala paw pyrthei naka jingleit jurip ka seng HANM ka Eastern West Khasi Hills District dang ha kine ki khyndiat sngi, u Myntri ula ïathuh ba ma u ruh namar ba u dang shu shimti ia ka kam kum u Myntri um shem la ïoh jingtip halor kane bad ula tip shaphang kane tad ynda ula ïoh ban ïakren bad ki jingtrei ka hospital haka jingwan jurip. U la ong haba u la ioh jingtip halor kane ula bthah ban shim kam da kaba tyngeh pyrshah ia u Pharmacist bad haka juh ka por ula iathuh ba bthah ban nang phah da uwei u Pharmacist khnang ba kan ym ktah ïaki paidbah kiba wan shim dawai na kane ka hospital.

Haba kylli haduh katno kan dang shim por ban pynbiang iaki nongtrei kum u Nongniah ambulance bad kiwei kiwei, u myntri ula iathuh ba yn pynkloi katba lah ban pynbiang ïaki jingdonkam. U bah Metbah ula iathuh ba ka jinglah ban pynpoi ïa u Myntri ka tnat ka koit ka khiah ban wan jngoh dalade ïaka hospital khlem artatien ki kam kin ïaid beit bad ula ïathuh ruh ba kila don katto katne tylli ki rai kiba u myntri ula shim ha kane ka sngi haka jingïalang bad ki nongtrei ka hospital naka bynta ban ai ïaka jingkyrshan ïaka Hospital.