Plie u Lat ban ai jingkhein da lade ha ka Khanasamari

U Lat ka jylla u C. H. Vijayashankar hynne ka sngi ula plie ia ka campaign na bynta ban ai jingkhein da lade ne Self-Enumeration Portal ha ka Khanasamari ne Census India, 2027 ha jylla Meghalaya bad ka dei ka sienjam ba kongsan ha ka Khanasamari hapoh ka ri India ba pyndonkam da ki kor Digital. Ha kane ka jingialang kaba la pynlong ha Lok Bhavan la wan ban iashimbynta lang ka Dr. Pooja Pandey kaba long ka Commissioner & Secretary sha ka sorkar Meghalaya bad ka State Nodal Officer for Census, u Director of Census Operations, Sorkar India u Biswajit Pegu, ki heh ophisar jong ka Tnad Census Operations, Meghalaya bad ki heh ophisar ka Sorkar Jylla.

U Lat ka jylla u C. H. Vijayashankar ula plie paidbah ïa kane ka sienjam da kaba pyndep hi da lade ïa ka rukom ai jingkheiñ da lade ha ka Self-Enumeration Portal, kaba long ka nuksa ïa ki nongshong shnong ha kylleng ka jylla.U Lat ula ban jur ia ka jingsuk, ka jinglong shai, bad ka jingtreikam jong ka rukom ai jingkhein dalade lyngba ka lad digital bad u la kyntu ia ki nongshong shnong ban iashim bynta shitrhem ha kane ka sienjam bad ula kitbok kitrwiang ïa ka Ophis jong Tnad Census Operations, Meghalaya, da kaba pynpaw ïa ka jingshaniah ha ka jinglah jongki ban pynlong ïa ka khana samari da kaba thikna, kaba tbit ha ka rukom trei kam bad kaba biang por.

Ka lad ai jingkhein dalade kan plie na ka bynta ki nongshong shnong naduh ka 1 tarik Jymmang haduh ka 15 tarik Jymmang, 2026.Ka rynsan online ka plie lad ia ki briew ban pyndap ia ki jingtip ba bniah jong ka iing ka sem jong ki da kaba suk, ia kaba hadien yn pynshisha da ki nongshim jingkhein ha ka por ba leit sha man ki tyngkong iing. Ki ophisar kiba la don ha kane ka sngi ki la ong ba kane ka sienjam kadei ka bynta ba kongsan jong ka Khana samari 2027 bad ka pyni ia ka jingangnud jong ka Sorkar ban pyndonkam ia ka teknoloji na ka bynta ban pynbha ia ka jingsynshar bad ka jingthaw ia ki polisi kiba pynshong nongrim ha ki sakhi. Kila pynshlur ia ki nongshong shnong ban pyndep ia ka jingai jingkhein dalade hapoh ka por ba la buh ban pynthikna ia ka jinglum jingtip kaba bniah bad kaba lah ban shaniah.