Hiar u MR na kali ban iakren ia ki nonghikai Vocational ba rah Placard

U Myntri Rangbah ka Jylla u Conrad K Sangma hynne ka sngi ula hiar na ka kali bad iakren bad ki nonghikai ba hap ha ka shatri jong ka Meghalaya Vocational Teacher Union (MVTA) hajan ka Madan Student Jaiaw. Ki nonghikai hapoh ka shatri MVTA ki la ialum hajan ka surok Madan Student Jaiaw ha ryngkat ki Placard ban pyni ia ka jingpyrshah ia ka Sorkar ka bym shym la kynthup ia ki ha ka jingpyntreikam ia ka rukom siew tulop thymmai lane ka New Pat Structure ia kaba ka Sorkar ka la pyntreikam na ka bynta ki nonghikai SSA bad 4th Teachers jong ka Jylla. Haka jingshisha ki nonghikai Vocational kila thmu ban leit sha Madan Student ba don u Myntri Rangbah lem bad kiwei Myntri Sorkar haka jingshah pynkupburom haki nonghikai SSA hynrei ki la shah khang noh hakhmat ka Synod college ban nym shah ban leit rah plakad hakhmat madan Student. Hadien ba mih na Madan Student, u Myntri Raangbah ula ïohi iaki dkhot ka MVTA kiba rah Pla Card ha surok bad ula hiar naka kali ba u shong bad ula ïakren iaki nalor ba ula shim ruh iaka dorkhas ba ki nongialam ka MVTA kila aiti.

“Ngan pyrshang ban leh ïa kaei kaba donkam katkum ka jinglah ka Sorkar bad ngan pyrshang katba lah ban iarap ïa phi” la ong u Conrad hashuwa ban kiew biang shapoh kali.Hashuwa kane u president ka MVTA u Bah Aibansuk Suchiang ula ong, ba ki nonghikai Vocational ki shah iehnoh shabar na ka jingpyntreikam ka ka rukom siew tulop thymmai kaba la pynbna na ka bynta kiwei pat ki nonghikai.“Kumba phi tip ba u Myntri Rangbah ka Jylla u thmu ban pyllait ia ka rukom siew tulop thymmai ia ki nonghikai SSA bad 4th Teachers hynrei kaba sngewsih ka long ba ngi ki nonghikai Vocational ngim shym la shah kynthup lang. Ngi sngew ba ngi shah iehnoh bein” la ong u Bah Aibansuk.“Dei na kata ka daw ba ngi la rai ban mih sha surok bad ban rah daki Pla Card namar ngi ruh ngi kwah ba ka Sorkar kan kynthup lang ïa ki nonghikai Vocational hapoh ka rukom siew tulop thymmai” ula ong. U Bah Aibansuk u la ong bane ka jingdawa jong ki nonghikai Vocational kadei ka jingdawa ka la bun snem.“Kumba phi tip ia ka jingpule haka Subject Vocational la sdang naduh u snem 2017 bad haduh mynta ngim pat ioh kano kano ka jingpynkiew tulop ne ka rukom siew tulop thymmai ne ka Policy naka bynta ban siew tulop iaki nonghikai Vocational” u la ong.

“Ngi la buh ïa kane ka jingdawa naduh u snem 2019 hynrei haduh mynta ka sngi ym shym la leh ei ei ban weng ïa ka jingeh jong ngi watla ngi la aiti bun siew iakai mat jingdawa sha u Myntri ka tnat Pule Puthi kynthup ruh sha Myntri Rangbah kaba pynpaw ïa ka jingdawa jong ngi ban pynthikna baka kam jong ngi ka skhem bad ban don noh daka rukom siew tulop thymmai” ula bynrap. “Ki nonghikai Vocational ki shim class naduh class IX haduh class XII, kaba mut na ka bynta ka Secondary bad Higher Secondary hynrei wat hapdeng kane, ka tulop jong ngi ka long kaba duna bha” ula ong. “Ngi sngew ba ngi don ka hok ban ioh ia ka rukom siew tulop kaba thymmai ban pynthikna ia ka jingsiew kaba mar katjuh na ka bynta ka kam kaba mar katjuh”.