Rakhe ka sorkar ia ka sngi Nongbylla, T.10 klur shi snem ia ka VDA ki Muster Roll

Ha ka sngi kynmaw burom ia ki nongbylla, khamtam ia ki nongtrei Muster Roll (May Day), u Myntri Rangbah ka jylla u Conrad K Sangma  ula ong, ba ka Sorkar Jylla ka la mynjur ia ka jingdawa jong ki ba la slem ba ia dei bad ka Variable Dearness Allowance (VDA) kaba wanrah ia ka jingpynlut kaba T.10 klur ha ka shisnem. Haba kren ha ka prokram International Workers’ Day ba la pynlong da ka Ophis Labour Commissioner bad ka Meghalaya Building & Other Construction Workers Welfare Board, u Conrad ula ong, ba ïa kane ka File ba ia dei bad ka jingdawa ki nongtrei Muster Roll la pynurlong ha ka 30 tarik Iaiong da k ba buh hakhmat ïa ka jingkordor jong ka 1 tarik Jymmang.

“Nga sngewkmen ban pyntip sha phi ha ka 30 tarik Iaiong ka Sorkar da kaba buh hakhmat ia ka jingkyrpang jong mynta ka sngi kata ka 1 tarik Jymmang, ngi la mynjur ia ka File bad ia ka VDA kaba thymmai na ka bynta ki nongtrei muster roll khnang ba ki nongtrei muster roll jong ngi kin ioh ia ki jingmyntoi kiba donkam bad kiba ki dei hok ba kin ioh” la ong Myntri Rangbah. Haba pynpaw ia ka jingshah ktah ka pla tyngka, u Conrad ula ong, ba ia kane ka rai la shim da ka pyrkhat ia ka bha ka miat jong ka imlang sahlang. “Kane kan pynlut shuh ia ka pla tyngka ba T.10 klur man u snem, hynrei ngi ngeit ba ia kane ka pisa kaba ngin pynlut ka long na ka bynta ka jingmyntoi jong ka bynta kaba kham heh jong ka imlang sahlang khamtam kito kiba duna haka ioh ka kot” ula ong.

“Kumta ka dei kaei kaei ba ka Sorkar kaba buh hakhmat ia ka bha ka miat jong ka imlang sahlang ka dei kaei kaei kaba ngi dei ban leh” u la bynrap. U Myntri Rangbah ula kdew ba ka jingai jingmynjur ia ka VDA kan ai jingmyntoi ia ki nongtrei Muster Roll.“Namar kata, ngi la shim ïa kane ka rai kaba kongsan bad nga sngewkmen ba kane kan ai jingmyntoi ïa ki hajar ngut ki muster roll bad ki nongtrei bapher bapher kiba trei ha ki tnat treikam bapher bapher” ula ong. Ka VDA, kaba don jingiadei bad ka jingkiew dor ki mar mara, ka la long ka jingdawa ba kongsan jong ki nongtrei muster roll ha Meghalaya kiba trei ha ki tnat bapher bapher katkum ka jingsiew ba ki ioh man ka sngi.