Ka jingpynkiew tulop ia ki nonghikai SSA, ka thong ban kyntiew ia ka pule puthi

Ki nonghikai SSA hapoh ka shatri Meghalaya SSA School Association (MSSASA) bad ki nonghikai 4th Teachers hynne ka sngi ki la pynkup burom ïa u Myntri Rangbah, u Symbud Myntri Rangbah bad kiwei ki Myntri Sorkar ha ka jingialang kaba la long ha Madan Student Shillong.

Kane ka jingpynkup burom ka dei namar ba ka Sorkar Meghalaya ka la pyntreikam noh ia ka rukom siew tulop thymmai (New Pay Structure) na ka bynta palat 12,000 ngut ki nonghikai SSA bad ki nonghikai 4th Teachers hapoh ka Jylla.

Haba kren ha kane ka sngi u Myntri Rangbah ka Jylla u Conrad K Sangma ula ong, ka lynti jong ka jingïakhun jong ka MSSASA bad ki nonghikai 4th Teachers jong ka Meghalaya ban poi sha ka jingjop ka dei ka lynti ba jrong ha ryngkat bun jait ki jingeh bad ki jingaiti lut jong ki nonghikai.

U Conrad ula iathuh ba u la don bynta lang bad ki nonghikai naduh 2016 haka por ba u dang dei u MP jong ka Tura Parliamentary Seat bad ula kren teng ruh hapoh Lok Sabha haba iadei bad ka jingeh jong ki nonghikai khamtam ki nonghikai SSA kiba shah set tulop ym duna 8 bnai.

Ula ong ba naduh 2016 haduh mynta ka sngi, ki don shi bun ki mat ba ka Sorkar ka la dep ban pynbeit hynrei ki dang don pat katto katne ki mat ba ka Sorkar ha ryngkat ka jingiatreilang bad ki nonghikai ka dang hap ban wad ki lad lynti ban pynbeit.

“Ngi la ïohi iaka jingiakhun jong phi ban poi shaka jingjop bad kane ka jingjop kam dei ka jingjop jong ka Sorkar hynrei kadei ka jingjop jong ki nonghikai kiba la iai shah bad kiba la shaniah ha ka Sorkar ban wad ki lad lynti ban poi sha ka thong kata ban don noh daka rukom siew tulop thymmai (New Pay Structure)” la ong u Conrad.

U Myntri Rangbah ula kam ba mynta ka sngi ka dei kawei na ki sngi kaba kyrpang tam haba trei bad shakri ia ki paidbah ka Jylla da ka kdew ba kum kine ki sngi, ba ka Sorkar ka don ka thong ban trei naka bynta ka bha ka miat jong ki paidbah.

Naka liang u Myntri ka tnat Pule Puthi u Bah Lahkmen Rymbui ula ong ba kane ka jinglah ban pynurlong ia ka jingdawa ki nonghikai SSA bad 4th Teachers ka dei namar ba naduh 2018, ka Sorkar Meghalaya ka la buh hakhmat eh ban kyntiew ia ka pule dangle hapoh ka Jylla.

U Bah Lahkmen ula ong ba ki nonghikai ki don ia ka bynta ban kyntiew ia ka pule dangle jong ki khynnah skul bad ka thong jong ka Sorkar ban pynbit pynbiang ia ki nonghikai khnang ba kin dang lah ban pynbha shuh shuh ia ka pule puthi ha la ki skul.