Paw kyrteng u James hakhmat na ki 5 ngut ban long MP Rajya Sabha

U Nongialam ka National People’s Party (NPP) u Bah Wailadmiki Shylla ula pynthikna ba ka kyrteng jong u James PK Sangma ka paw napdeng ka thup kyrteng ba ka NPP ka thmu ban phah kum u Member of Parliament (MP) sha Rajya Sabha.

Haba kren shaki lad pathai khubor u Bah Wailad ula iathuh ki don 4-5 ngut ki briew ba ka NPP ka la ithuh ban phah kum u MP Rajya Sabha hynrei ia ka rai ba khatduh, ka NPP kan sa shim hadien ba la lum ia ka jingïalang.

U Bah Wailad ula iathuh ba watla ka thup kyrteng ka la don hynrei haduh mynta ka jingïakren ka dang iaid iano ka NPP kan jied ban phah kum MP Rajya Sabha.

“Ka jingiakren ka dang iaid, kumta khlem artatien ka kyrteng jong u James PK Sangma ruh ka la paw, hynrei ka shong ha ki nongialam ba rangbah ka NPP ban shim ia ka rai, iano ka ibit ban phah kum MP Rajya Sabha” la ong u Bah Wailad.

Haba kylli halor ka jingdawa ki paidbah na Garo ban phah ïa u James kum MP Rajya Sabha, u Nongialam ka NPP ula ong “Na ki thain bapher bapher kin don la ka jong ka rukom pyrkhat, kumta thikna ba kane ka jingdawa kam dei kaba phylla ne dang thymmai namar ngi don tang 1 MP Rajya Sabha ha Meghalaya, kumta thikna ba baroh ki thaiñ kin kwah”.

“Kumta kan ym long kaba thymmai ne phylla, nga tharai wat na Jaintia Hills ruh kin kwah ba u MP un dei na Jaintia, ki Khasi ruh kin kwah ba u MP un dei u Khasi, hynrei kaba khatduh ka shong ha ka Party ban rai iano ka ibit ban phah sha Delhi bad ban rah ia ki mat jingdonkam ka Jylla” ula ong.