Da ki kor Digital yn lum jingkhein Khanasamari 2027, palat 8 hajar ki nongshim jingkhein

Ka bynta banyngkong ki kam ba ia dei bad ka Khanasumari 2027 ha Meghalaya kan sdang naduh ka 16 tarik u Jymmang, 2026 ban lum jingtip na ki iing ha kylleng ka jylla. Kane ka kam ka ban long baroh shibnai kan bteng haduh ka 14 tarik Jylliew, 2026, kynthup ia baroh 12 tylli ki district ka jylla Meghalaya lyngba ka rukom lum jingtip da ka lad digital.

La pynlong ia ka jingialang bad ki lad pathai khubor ha Shillong Press Club hynin ka sngi da ka Press Information Bureau, Shillong ryngkat ka jingiatreilang bad ka Tnad Census Operations, Meghalaya ban ai jingtip ia ki nongthoh khubor halor ka rukom treikam, ki lad pynkhreh ka rukom treikam digital bad ka jingiaid shaphrang ki kam ai jingkhein da lade kiba dang iaid shakhmat.

Haba ai jingkren sha ki ha ki nongthoh khubor u Director ka Census Operations, Meghalaya, Sorkar India u Biswajit Pegu ula pyntip ba la thung haduh 8,309 ngut ki nongshim jingkhein bad ki nongpeit kam ha kylleng ka jylla na bynta ban lum jingtip na ki iing. Baroh ki don 9,950 tylli ki House Listing Block (HLB) ba la pyndep ha kylleng ka jylla na bynta ki kam ba ia dei bad ka Khanasamari 2027.

Ula ong, ka jinglum jingtip na ki iing ka dei ka nongrim jong ka khanasamari baroh kawei bad yn lum ïa ki jingtip ba ïa dei bad ka jinglong jingman ki ïing, ki tyllong um dih, ki kam pynkhuid, ki jingdonkam ha ïing bad ki jingdon jingem. Ki nongshim jingkhein kin leit jngoh man ki iing bad ka longiing ha ka kam ba 30 sngi ban pynthikna ia ka jingkhein ba pura bad kaba thikna.

U Pegu ula pyntip ka Khanasamari 2027 la pynlong lyngba ka rukom treikam digital. Ki nongshim jingkhein kin lum bad phah ia ki jingtip lyngba ka Mobile Application da kaba pyndonkam ia ki smart phone hapoh ka kam “Bring Your Own Device” (BYOD). La khmih lynti ka rukom treikam digital kan pynthikna ia ki jingtip bad ban lait na ki jingbakla.

Ka Tnad ka la pyntip ka jylla Meghalaya ka la lah ban pyndep 100 percent ia ka Geo-tagging bad ka jingpynbeit ia baroh ki House Listing Block ha baroh kawei ka jylla. Ka kam ka kynthup ia baroh 12 tylli ki distrik, 7428 tylli ki shnong bad 9 tylli ki shnong ba pynthikna ia ka jingpynkhreh ba pura ban sdang ia ki kam. Ka East Khasi Hills ka don bun ki HLB haduh 2,159 bud ka West Garo Hills 1,488 ki HLB.

Halor ka rukom ai jingkheiñ da lade, ki ophisar ki la pyntip ka bynta ban ai jingkheiñ hi da lade lyngba ka lad online, ka la sdang naduh 1 tarik u Jymmang, 2026, kan kut ha ka por shiteng miet mynta ka sngi. Ki nongshong shnong ki lah ban pynpoi ïa ki jingtip ba bniah jong ki ïing ki sem jong ki lyngba ka lad digital ha rynsan Self-Enumeration. Ki ophisar ki la ong ka Meghalaya ka la sakhi ïa ka jingpynshlur ïa ki paidbah ban ïashim bynta ha kane ka kam bad West Khasi Hills ka dei ka Distrtict ba bun tam ki nongai jingkhein da lade bud sa ka East Khasi Hills bad ka West Garo Hills.

U Pegu ula pynshai ïa ki jingtip la ai lyngba ka rynsan Self-Enumeration yn pynshisha da ki nongshim jingkheiñ ha ka por ba ki leit sha ki ïing bad tang ïa ki jingtip ba la pynshisha yn upload lyngba ka HLO application.

Ki la pyntip ba la ai jinghikai ia ki Nongshim jingkhein bad ki Nongpeit kam halor ki jingmut ka khanasamari, ki rukom treikam bad ka jingpyndonkam ia ki digital application na bynta ban lum jingtip ba thikna. Ha ki sngi banyngkong ka jingtreikam, ki nongshim jingkhein kin pynshisha ia ki pud ki House Listing Block ban ithuh ki jaka ban pynkhreh ia ki map bad ban ai nombar ia ki iing shwa ban sdang ban lum jingtip ia ki iing.

Ka Tnad ka la buh ka rukom pynthikna ba khlain kynthup ka jingpeit bniah ha ka por jurip ia ki jaka bad ka jingpynshisha ha kano kano ka jaka ba donkam. La pyntreikam ruh ia ki lad ban lum jingtip offline ha ki jaka ba duna network.

Haba kyntu ia ki nongshong shnong ban iatreilang bad ki nongtrei ka khanasamari, u Pegu u la ong ka jingiashim bynta ki paidbah ka long kaba donkam ban pynthikna ia ka khanasamari kaba kynthup lang ia baroh ban kyrshan ia ka jingthmu ha ki por ban wan, ka jingai jingiarap bad ki sien jam ba ia dei bad ka roi ka par ha kylleng ka jylla.

Kiwei ki ophisar ba la ai jingkren ki kynthup ïa u Subhashish Chatterjee, Joint Director; u B. Basumatary, Deputy Director; bad Bah Aibor Sanglyne, Deputy Director ka Tnad Census Operations, Meghalaya katba ia ka prokram la pyniaid da u Gopajit Das, Assistant Director, PIB, Shillong