Ka Sorkar ba ialam ka NPP kam ju pyndonkam bakla ka bor pyrshah ia ki paidbah

U Myntri Rangbah ka Meghalaya Conrad K Sangma hynne ka sngi ula ong ba ka Sorkar ka la trei ki kam da kaba buh ia ki paidbah hakhmat ki kam pynroi.

Haba kren ha ka jingialang ha Damas, u Myntri Rangbah ula kdew ia ki kam thymmai ha social media ba pynphriang ia ki khubor lamler bad ialam bakla ia ki paidbah bad pyrshang ban ioh burom ia ki kam pynroi ba leh da ka Sorkar ba ialam ka NPP.

Ula ong kine ki juh ki briew ba leh politik ki la pynphriang ia ki jingtip bakla ban kynthoh pyrshah ia ka Sorkar halor ki kam ki bym lah ban pynbeit da ki snem hynrei la lah ban pynbeit khatduh da ka Sorkar ba ialam ka NPP.

“Ngi kum ka Sorkar ngi buh ka bha ka miat ki paidbah hakhmat eh jong ki kam pynroi bad ngi la trei na ka bynta ka jingmyntoi ki briew jong ngi. Ngi la buh ia ka hok ki padibah trai ri hakhmat duh” ula bynrap.

Haba kren halor ki jingjia bapher kiba la tynjuh ia ka Sorkar, ula ong ba ka Sorkar ba ialam da ka NPP ka la bat skhem ia ka nongrim ban ym pynibor bad kam pat ju pyndonkam bakla ia ka bor pyrshah ia u paidbah. “Ngi la bat ia ka nongrim ban nym pynibor man ki jingjia. Namar ki paidbah ki iai don hapdeng ha ka mat treikam na ka bynta ka roi ka par”.

Ula ong ka Sorkar ka ngeit ba ki jingiakren bad jingiasyllok bad ym ban pyndonkam ia ka bor ban pynsngap jar ia ki sur. “Ngi kwah ban wanrah ia ka lynti ban pynbeit baroh ki jingeh. Ngi ngeit bad sngap ia ka jingiakren bad ki briew”.

Ha ka por ba mih ka jingeh halor ka GHADC, u pyntip ka Sorkar ka la jubab ia ki Sengbhalang bad ki paidbah baroh. “ Ngi burom ia ka jingsngew ki briew bad ngi jied ban rai ia kaei ba ki paidbah ki kwah ban pynlong kongsan ia ka syrnot ST ban iakhun elekshon GHADC”.

“Ki don ki jingiakhih halor kane ha ki snem ba la leit. Kane ka dei ka jingdawa ba la rim, ym pat ju don ki Sorkar ban rai ban pynbeit ia kane ka kam, hynrei ka Sorkar ba ialam ka NPP bad ka Executive Committee ka GHADC ba ialam ka NPP ka la rai ban pynkylla ia ka ain ban weng noh ia ki bar jylla na ka jingiakhun elekshon ka Autonomous Council.

“Ha man ki kam ba leh ka Sorkar ki paidbah ki don hakhmat eh” ula pynpaw bad pyntip ba la thung ia ka “Delimitation Committee ban pynkhreh la ka jong ka electoral roll ha ka GHADC.

Haba pynpaw ia ka Sorkar la ialam da ki buit treikam u Nongialam barim (L) Purno Agitok Sangma, u Myntri Rangbah ula ong “Ngi jied ban trei na bynta u paidbah ha ka jaka ban pyrshah ia ki liang pyrshah kiba ju kam burom ia ki kam ba ngi trei”.

“Ki paidbah ki iohi ia kaei ba ngi leh. Kiba leh mynleh bad ki drama ban khring ia ki briew ha ki social media, hynrei ia ki kam ba shisha ka Sorkar yn bishar ki paidbah ka Jylla. Ka jingkut jingmut ka iai long kumjuh ia ki briew kiba la ai ka jingshaniah”.

Ula kren halor ki jingkylla ba la wanrah ia ki prokram sengkam seng jam ka Jylla ban pynkup bor ia ki samla bad plie lad ioh kam ioh jam. Kum ka PRIME (Promotion and Incubation of Market-driven Enterprises): Ka ai ia ki jinghikai, ki nongpyni lynti (mentorship) bad ka jingkyrshan ban pynkylla ia ki buit treikam thymmai ban seng kam.

CM-Elevate: Ka tyrwa ia ka subsidy pisa (haduh 75%) ka jingkyrshan ram ha ka kam jngohkai, ka rep ka riang bad ki service sector ban iarap ia ki samla ba kin trei ia la ki kam.