Kwah ka NEHUTA ia u VC batbit ban kyntiew ia ka NEHU

Ka seng ki nonghikai ka North Eastern Hills University Teachers Association (NEHUTA) ki la pynpaw ba ki kwah ban ioh da u Vice Chancellor (VC) ba la long biang pura bad uba don ka jingpyrkhat ban kyntiew ia ka NEHU.

Haba kren sha ki lad pathai khubor u President ka NEHUTA u Prof. Lakhon Kma ula ong ba ka NEHUTA, ka dawa ba dei ban wanrah beit da u VC ba biang bad ba la bit pura ban shimti ia kane ka kam bad bynrap lada ioh da VC na riewlum ruh kan bha eh bad lada ioh ia u VC nabar jylla ruh ka pdiang hynrei ki dei ban long ki briew kiba biang bad kiba lah ban trei na bynta ka skulbah NEHU.

U Prof. Lakhon Kma ula ong ba ka NEHUTA kam lah ban pdiang ban shu wnarah ia uno uno u VC ubym pat bit bad u bym pat biang pura ban pyniaid ia ka NEHU, namar kane ka skulbah kam dei ka jaka bret niut ban wanrah ia ki VC bym ler kumba long u Prof. Prabha Shankar Shukla.

Ula bynrap, “Ngim kwah ban dawa ban ai iangi da ‘uta’ ne ‘Kata’ ka VC hynrei ngi kwah beit da u VC ba biang tam eh ba lah ban pynkiew ia kane ka shlem pule kaba la hiar shaba palat ha kine ki 12 snem”.

Ula ong ba kum ka skul bah ka khmih lynti ba kan ioh ia u VC ba pura ba shong beit ha syndah bad ki uba don jingsngew ia ka NEHU bad ka jylla.

“Kane ka University kam dei ka jaka bret niut khamtam ki VC bym ler kum u Shukla ki long kum ki niut. Lada um dei u VC ba biang ngin kyrpad ba kum kita ki kandidet wat aplai ha NEHU,” ong u Prof. Kma

Haba kylli la u don jingthmu ban aplai ia ka kam VC, u Prof. Kma u la ong ba katkum ka ain ka rule um pat long uba bit ban long VC namar uno uno uban long VC udei ban long 10 snem kum u Prof.

Ula iathuh ba u la long Prof ha u 2017 bad ha u snem 2027 un sa long uba bit ban ialeh ia ka VC. Hynrei ha kajuh ka por u la pynpaw ba ia mynta u dang don sa 1 snem bad sa 15 snem ha NEHU, um pat kyrkieh namar ia mynta u dang sngewtynnad ban long kum u nonghikai.