Ka Meghalaya ka jylla banyngkong ha India ban mab T.900 klur ka khajna kali

Ka All Meghalaya Commercial Vehicles Forum (AMCVF) hynne ka sngi ka kam ba ka Sorkar Meghalaya ka dei kaba nyngkong eh ha Ri India ban mab ei haduh T.900 klur ka khajna ba dei ban lum na ki kali kamai. Kane ka wan shisngi hadien ba ka kynhun Myntri Sorkar ka la rai ban mab noh 90% ka kuna ba ia dei bad ka Fitness Certificate ki kali bad 80% ka khajna jong ka Goods Passengers Tax  ba sahteng da ki nongniah trok bad kiwei ki kali kamai la palat 20 snem. Haba kren sha ki lad pathai khubor u Spokesperson ka AMCVF u Bah Soomeyo Sayoo ula ong, ba ka 27 tarik Jymmang 2026, ka dei ka sngi ban sah kynmaw ïa ki trai kali bad ki nongniah kali kamai, naduh ki kali barit, ki kali Tourist, ki bolero pickup, ki truck bad kiwei namar ka Sorkar Jylla ka la rai ban mab ia ka khajna.

“Ka dei ka Sorkar kaba nyngkong hapoh India ban pyrkhat na ka bynta u kup shilliang, u sem shilliang, uba duk ba suk namar ka la mab bad ailad ïa ngi ban siew noh satang 10% ka kuna Fitness bad 20% ka ka  Tax” la ong u Bah Soomeyo. U la bynrap ba jingmab ka Sorkar ia ka kuna kan ktah bha ia ka pla tyngka ka Sorkar, namar baroh ki tip ka Meghalaya ka dei ka Jylla kaba duna bha ka lad ban lum khajna na ki paidbah. “Hoid namar ka jingmab noh ia ka kuna jong ngi kaba kot T.900 klur, kan wanrah ka jingduhnong ia ka Sorkar hynrei ngi tip ki nongialam ka Sorkar da ka jingiohi jngai bad da ka jingpyrkhat ia ki paidbah ki la kloi ban mab ka kuna” ula ong. “Ngi ïa don hangne baroh kiba don bynta ha ka kit ka bah, kamai kajih bad nga kwah ban ong, kane ka Sorkar kam shym la iarap tang ïa ngi kiba don kali heh, ka la iarap naduh kiba don kali rit, kali Tourist, ki bolero pickup. Kane ka Sorkar ka la khmih lynti bad ka la pynïaid ha kata ka rukom ba ngin ioh jingïarap na ka por sha ka por” ula ong.

U Nongialam ka AMCVF ula kyntu ia ki para trai kali bad nongniah kali ba kin shim ia kane ka kabu ksiar ba ai ka Sorkar bad kin sdang ban siew tista noh ia ka bai pynthymmai kot kali bad ia ka khajna. “Nga kyrpad ia baroh ba buh kali naduh ki Alto 800, Tourist, Pickup, ki trok bad baroh ki kali kamai ba ki dei ban shim ïa kane ka kabu ksiar ba kin siew noh ia ki kot kali jong ki naduh mynta khnang ba ngi ruh ngin lah ban don bynta ban kyntiew ia ka ioh ka kot ka Sorkar bad ka Jylla” ula ong.