Bym ioh jingbit, rah jubor ki Pulit ia u President ka JCOSMWA shabar Gate Deputy Commissioner

Ki Pulit ka East Jaiñtia Hills hynne ka janmiet ki la rah daka bor ia u president ka Jaiñtia Coal Owners and Suppliers Miners and Workers Association (JCOSMWA) uba dang pynlong iaka jingiakhih daka ba shah thngan ha phyllaw jong ka Ophis Deputy Commissioner (DC).

Lah ban kdew ba u president ka JCOSMWA ha ryngkat ki dkhot ki la sdang ia ka jingshah thngan khlem pud sngi ha phyllaw ka ophis Deputy Commissioner ban dawa na ka Sorkar Jylla jylla ban pyntreikam noh ia ka polisi tih dewiong kaba iadei bad ki paidbah ka thain Jaintia Hills bad ka Jylla hi baroh kawei.

La ioh jingtip ba ka JCOSMWA kam shym la ïoh jingbit na ki bor district ban pynlong ïa ka jingiakhih daka ba thngan khlem pud sngi ha phyllaw Ophis Deputy Commissioner.

Ha ka por janmiet, ki pulit ryngkat bad ki bor district ki la lah ban beh ia baroh ki dkhot jong ka JCOSMWA na phyllaw Ophis Deputy Commissioner nkatba ia u president ka JCOSMWA la rah shu jubor shabar phyllaw da ki pulit.

Ha kane ka jingshah thngan, u president ka JCOSMWA u Bah Marshal S Biam u la ong ba mynta la dap 12 snem naduh ba la khang tih dewiong hapoh ka jylla Meghalaya khamtam ha ri lum Jaintia bad ka Sorkar jylla bad ka JHADC kim shym la wanrah satia ia kino kino ki ain lane ki policy kiba iahap ia ki trai shnong kiba tih dewiong.

U Bah Marshal u la ong ba wat haba iadei bad kiwei pat ki marpoh khyndew, ka Sorkar Jylla jylla bad ka JHADC kim shym la thaw satia ia ki polisi bad ki kyndon kiba iahap bad ka rukom tih marpoh khyndew daki trai shnong.

“Wat la ngim pat ioh jingbit ban iakhih hynrei ngi pyndonkam ia ka hok jong ngi ban iakhih da ka jingshah thngan khlem kut por da kaba suk, nga kyntu ia ka bor district ban ailad ia ngi ban iakhih, khnang ba kane ka khubor kan leit sha ka sorkar jylla ban thaw ia ki kyndon bad ki polisi kiba iahap bad ki paidbah nongshong shnong haba iadei bad ka jingtih dewiong”.