Phuh mat ki nongrep ba heh ka iew die mar rep

Ka jingpynlong ia ka Meghalaya’s Farmers’ Market hynne ka sngi ka la jam sha ka sien kaba hynriew ne Sixth Edition, ha kaba ka la khring ia ki nongthied kiba wan ban thied ia ki jhur ki jhep kiba thung bad pynmih hi da ki nongrep ka Jylla.

Kane ka Iew ki Nongrep ne Farmers’ Market ka la long kaba pawnam bad ki nongrep kiba kyntiew ia ka jingrep ia ki jhur khlem da pyndonkam dawai ne Organic Farming, ha kaba ki paitbah kila wan ban thied khnang ia ki jhur bad ia ki soh ha ryngkat bad ka jingpynshlur ia ki nongrep tynrai ka jylla ba kin pyninam ia ki marrep ki jongki.

Ha kane ka Iew la sakhi ba ki nongrep kila lah ban die bha ia ki sohsaw, sohtrun, sohlakum bad kiwei kiwei ki marrep.

Ka jingpynlong ia kane ka Iew ka dei ruh kaba pyni ia ka jingioh jngai jong u Myntri Rangbah ka Jylla u Conrad K. Sangma ban pynkhlain ia ka kamai kajih jong ki nongrep bad ban thaw ia ki lad ki lynti ha ka liang ka rep ka riang, ban kyntiew ia ka jingrep tynrai bad ban ai ka rynsan ia ki nongrep ba kin die ia ki marrep bad ban iakren markhmat ruh bad ki nongthied khlem ka jingtuklar jong kino kino kiba wan ban don hapdeng jong ka khaii pateng (Middlemen).

Ia kane ka Farmers’ Market la pynlong da ka 1917 iTEAMS hapoh jongka Department of Agriculture & Farmers’ Welfare ka Sorkar ryngkat ka jingkyrshan jongka Meghalaya Farmers’ (Empowerment) Commission. Kane ka sienjam ka plie ia ka lad ia ki nongshong shnong bad ki nongjngohkai bad kin ioh ia baunjait ki marrep kiba la pynmih da ka jylla.

U Bah Gavin C. Shullai, Programme Manager jongka 1917iTEAMS, ula ong, ba ha man la ki khyllipmat, kin don beit kumba 20 ngut ki nongrep, kaba mut palat ia ka 100 ngut ki nongrep na ka wat kaba nyngkong haduh kaba hynriew kial wan iashimbynta.

Ula pynpaw, ba ha ka Farmers’ Market la sdang ruh ia ka jingdie ia u ‘Ice Cream’ uba la pynmih da kawei ka kynhun kaba na Shillong bad la buh ruh ia ka jaka ialehkai ka ‘Bouncy Castle’ khnang ba ki heprit kin ioh ban ialehkai, namar la sakhi ba bun ki kmie ki kpa kiba wan sha kane ka Iew ki wan ialam lang ruh ia la ki khun.